Gerîlayê PKKyî bi des serran ê hemverê dewleta tirkî de û hemkaranê înan de bêvindertiş mucadele danê.

Gerîlayanê YJA Starî ra Silav Newale çarçiwaya perwerdeyan de bitaybetî wareyê weşîye de hemrayanê xo û mucadeleyî rê havile kena. 

Silav Newala ke paytextanê xoverdayîşan ra Amed de amîya dinya, cuya xo ya verê vejîyayîşê serê koyan wina qal kena: “1994 de ez Amed merkez de amîya dinya. 2010 de tewrê sefanê gerîla bîya. Hewna ke ez qice bîya dewe de embazî ameyêne keyeyê ma..”

 ‘EZ FERMANDARÊ SEHAYA AMEDÎ HEMRA NUMANÎ RA ZAF MUTESÎR BÎYA’

Gerîla Silave vat ke sîstem de cayo ke cinî xo bieşko îfade bikero, estbîyayîşê xo bipawo û bi hawayêkê manîdarî biciwîyo çinêbi û wina vat:

“Sîstem cinî bi hawayêkê cewherkîyî nas nêkeno, cinî cewherê aye ra dûrî fîneno.

Gama mi reya ewilêne fermandar Numanî dî ez hewna domane bîya, la rixmê nê zî mi mîlatînî û peymeyê partî yê ke Rayberî ardêne ziwan ê de dîyî. Girêdayîşîya hemra Numanî ya bi Rayberî û partî mi ser o xeylî tesîr kerd.”

GERÎLA ÎFADEYÊ AZADÎYE YO TEWR PÎL O

Silave derheqê tecrubeyê xo yê ewilênan yê mîyanê gerîlayan de wina qal kerdî: “Gama ez newe tewrê gerîla bîya û mi dî ke destê cinî de sîleh, mîyaneyê ci de rext esto û mi zana ke ê seva azadîye nê koyan de yê nê  çîyan mi ser o zaf tesîr kerdibi. Çunke sîstem de vînayîşê cinîyêk ke hende bieşko seva welatê xo, Rayberê xo û şarê xo şer bikero zaf zor o.

Koyan de mi hemrayîya raştekîne dîye. Gerîla nasnameyêko newe yo, sîstemêko newe yo. Sîstem de gerîla sey tenya kesê ke sîleh şuxulnenê yenê ramotene. Labelê gerîla her wareyê cuye de detayê ci zanayîş û hişmend bîyayîş o.”

TENYA ŞUXULNAYÎŞÊ SÎLEHÎ SEBA GERÎLAYÊK QÎM NÊKENO

Silav Newale bale ante ke ganî gerîla xo her wareyî de aver bero û vat: “Sere de hemverê sihetkare bîyayîşî weşê mi nêşibi, heta fikarê mi estbî. Mi vatêne nê organîzasyonî de ez eşkena her karî bikerî la sihetkarî zor. La serra 2015 de hemleya Bêşebabî de tayê embazê ma birîndar kewtî û keso ke mudaxele bikero çinêbi.

Na yewe ra ma nêeşkayî înan tedawî bikerê û ê şehîd kewtî. Nê halî mi ser o zaf tesîr kerd, mi a game fam kerd ke şuxulnayîşê sîlehî seba bîyayîşê gerîla qîm nêkeno. Mi qerar girewt ke se beno wa bibo ganî ez sihetî bimûsî.”

MA TENYA BI HAWAYÊKÊ FÎZÎKKÎYÎ TEDAWÎ NÊKENÊ

“Gama mi rojaneyanê xoverdayîşê Sûrî wendî mi fam kerd ke eke sihetkarî zaf bitecrube mebê xeylî vindîbîyayîşî virazênê. Mi sere de hetê teorîkî ra dima ra zî pratîk de bi mudaxelekerdişê çend embazan wareyê sihetî de mesuldarîye girewte.” 

Silave peynîya qiseykerdişê xo de wina vat: “Mi rê çîyo ke tewr zaf moral dano dimayê tedawîye ra weş bîyayîşê embazanê birîndaran o. Gama ez înan tedawî kena hîsêk seke ez birîndar a mi dir virazêno. Ma de tenya hetê fîzîkkîyî ra tedawîkerdiş çinyo. Ma hetê ruhkî û psîkolojîkî ra zî embazanê xo rê benê hetkar. Dimayê kerdişê karê doktorîye ra mi moralêko pîl girewt, çunke mi fam kerd ke çîyêk ke kes tera biterso nêyo. Bi na mesuldarîye ez qesasê serranê verênan gêna.”