Gerîlayê HPGyî: PKK seba heme şaranê bindestan mucadele keno

Gerîlayanê HPGyî da zanayene ke PKK wextê ronayîşê xo ra heta ewro seba heme şaranê bindestî mucadele keno û vat ke serra 41. do bibo serra azadîya Rayber Apoyî, şarê kurdî û heme şaranê bînan.

Gerîlayanê HPGyî bi wesîleya serragêrayîşê ronayîşê 40. yê PKKyî ANFyî rê qisey kerd.

Gerîlayan ra Denîz Guven bale ante tecrîdê serê Rayberê Şarê Kurdî Abdullah Ocalanî ser û va: ‘‘Hedefê ma yo tewr gird azadkerdişê Rayber Apoyî yo. Ganî heme ciwanê kurdan zî hemverê qirkerdişê kurdan de verê xo bidê koyan ya zî cayanê bînan ê xoverdayîşî de ca bigêrê. Ma sey gerîlayê Kurdistanî do seba azadîya şarê xo, xeta Rayberîye de mucadeleyî xurt bikerê.‘‘

PKK SEBA HEME ŞARANÊ BINDESTAN MUCADELE KENO

 

Êrîş Andokî ke bi pîrozkerdişê serragêrayîşê 40. yê PKKyî dest bi qiseykerdişê xo kerd, ard ziwan ke PKK seba heme şaranê bindestan ame ronayene. Andokî va: ‘‘PKK wextê ronayîşê xo ra heta ewro azadîya şaran esas geno. Ma zî sey gerîlayî do nê demî rê cewab bê û xîyalanê şarê xo bîyarê ca. Ma do qesasê embazanê xo yê şehîdan bigêrê. Ez tîya ra veng dana waye/birayanê xo wa verê xo açarnê koyanê azadan û mucadeleyî gird bikerê.‘‘

Gerîlayê HPGyî Fîraz Cudî zî nê vatî: ‘‘Çew PKKyî bi vateyan nêeşkeno bido fehmkerdene. Raştîya PKKyî pratîkê ci de yena dîyêne. PKK hemverê heme nêheqîyan de mucadele keno. Serra 41. de zî do PKK bi ruhê Kemal, Mazlûm, Xeyrî, Hakî, Zîlane û Berîtanan mucadele bikero û şarê kurdî û heme şaranê bindestî azad bikerê.‘‘