28ê Kanûne 2011 de Roboskî de qirkerdişanê gonîweran ra yew ame viraştene. Ciwanê ke qirkerdişê Roboskî de embazê xo yê domanîye kerdê vîndî tewrê sefanê PKKyî bî û vanê: "Hîsê ma yê qesasî bi organîzasyonî hîna beno pîl."

Gerîlayê HPGyî Cesûr Roboskî yo ke serra dîyine ya qirkerdişê Roboskî de tewrê sefanê PKKyî bi vat vero ke dewleta Tirkîya ronîyo û sînorê Kurdistanî bêrê xêzkerdene zî Roboskî ser o zextî estbî la şarî rixmê zextan de wareyê xo terk nêkerd.

'VINDERTIŞÊ ŞARAN ROBOSKÎ PAYRA GIREWT'

Cûdî Roboskîyî nê vatî: “Roboskî sînor de yo. Qaçaxçîtî seba şarê ci yo ke xêrcê nê şansê ci yo ekonomîk çinyo rayîrê debare yo. Heme dewê sînorî nê karî kenê. Seba ke qereqolan nêeşkayêne vernîya nê bigîrê şarî ra ‘bace’ girewtêne. Helbet na bace bacêka qeydkerdî nêbî, bacêka teberê qeydî de bî. Leşkeran reya peyêne vatibi ‘na peyên a.’ Eslê xo de merdimî fam kerdêne; hem bejik ra hem zî hewa ra hadreyî estbî. Peynî de înan ûca embazê ma şehîd kerdî.”

Roboskîyê HPGyî vat: “Qirkerdişî ra dima vşndertişê şarî û wayîrvejîyayîşê ci tesîrê qirkerdişî nêwedaro zî bibi moralêko pîl. Tena Roboskî nê heme şarê Kurdistanî wayîr vejîyabi û şarê Tirkîya zî hemverê qirkerdişî de vejîyabî. Şarê Roboskî qirkerdişî ra dima serre nêna ro.”

'WAŞT KE CILANÊ GERÎLAYAN BIDÊ CENAZEYAN RA!'

Cûdî qiseykerdişê xo wina domna: “Dewleta Tirkî waşt ke cilanê gerîlayan bido cenazeyanê 34 hemwelatijan ra. La seba ke şar tavilî cenazeyan rê wayîr vejîya vernîya nê amî girewtene. Heta ewro tu leşkerêk ke nê qirkerdişî de ca girewtibi nêame muhakemekerdene. Înan medyaya Tirkan zî seba serê qirkerdişî bigîrê xebitnaye. Medyaya Tirkan bi ziwanê dewlete nizdê qirkerdişî bî.

Dima ra înan keyeyanê Roboskîyan rê bi teklîfkerdişê pereyan waşt ke mesele bêveng bikerê. Dewlete bi 34 canan bi nê teklîfê xo heqaret kerd. Xora tu keyeyêk tenezulê ê pereyî nêkerd. No zî vindertişo esil yê şarê ma ramojneno.”

'HÎSÊ QESASÎ BI ORGANÎZEBÎYAYÎŞ BENÊ PÎL'

Peynîya qiseykerdişê xo de Cûdî nê vatî: “Xeylî embazê ma bi hîsanê qesasî tewrê sefanê PKKyî bî, êyê ke şehîd kewtî zî eestbî. Êyê ke hewna mucadeleyê xo danê zî estê. Êyê ke bi hîsanê qesasî tewrê ci bî nê hîsanê xo bi organîzebîyayîş hîna kenê pîl. Dewlete ganî tewr zaf zî nê ra biterso. Şarê Kurdistanî bi şeref û rûmetê xo cuyeno. Girewtişê qesasê 34 embazanê ma û bicaardişê xeyalê înan gureyê ma yo.