Weşîya Kîbrîye Evrene, Hîlal Olmeze, Evîn Kayaye yê ke 59 riojî yo Zîndanê Amedî de grevê vêşanîye yê bedêm-bêagêrayîşî de yê  roj bi roje bena girane, awe zi bi zorî şimenê, roşnîye û vengî ver zaf bîyê hesas. Problemê tansîyon û şekirî peyda bîyo û xeylî kîloyî zî kerdê vîndî û bîyê zeîf. Hetê bînî ra qaso ke xebere ameya girewtene, nêzdîye yew menge yo ke rojnameyê yenî yaşamî zî nêdîynena girewteyan.

ÇALAKÎYÎ KE BIBÊ PÊT, O WEXT TECRÎD ZÎ YENO WEDARITENE

Girewteyanê cinîyan derheqê xoverdayîşê xo de peyamêko winasî da: “ Xoverdayîş bi ked û paştdarîya şarî reso na merhale. Ma zanîme ke ked û paştdarîya şarê ma ewro ra dima zî do dewam bikero. Ma domanê şaro ke Cizîre, Sûr, Nisêbîn, Gever, Gimgim û Efrîn dîyo yîme. Seba ke meydananê Cizîre, Sûr û Nisêbînî de ma ked nêkerd û paştdarîyêka pête nêdaya, zerrîya ma şikite, wîjdanê ma dejaye yo. A roje ke ma wayîrê xoverdayîşan bivejîyêne, beno ke ewro rewşa ma cîya bibîyene. A roje seba ke ma vera nêheqî, zulim û qirkerdişî nêvejîyayîme, ewro no baro giran kewto vileyê ma.

 Hîna ke tîya de merdimî Nêmerdê, ganî her kes, bitaybetî zî cinî û ciwanî bi berpirsîyarîye rawirsê payan ser. No wayîrvejîyayîş do faşîzmî qels bikero û rayîrê azadîye a bikero. Ma venga şarê xo danîme ke wa bi nê esasan wayîrê grevanê vêşanîye bivejîyo û meydanan bêveng nêverdo. Tecrîdê Îmralî û tecrîdê serê şarî do bi no qeyde bêro wedaritene. Faşîzmî ra nêtersê û faşîzmî tersonîkîya xo de bixendeqnê.  Ma do bibê serkewte, şarê ma do bibo serkewte, xoverdayîşê ma do bibo serkewte.“

ÇINKILIÇ: REWŞA FAŞÎZMÎ GRÊDAYÎYÊ TECRÎDÎ YA

Çalakwanan ra yew zî Nîmettûllah Çinkiliç o. Çinkiliç 59 rojî yo ke hepisxaneyê girewteyî yê tîpê D’yî yê Amedî de, grevê vêşanîye de yo.

Çinkiliç serra 1993’yî de Bêdlîs de maya xo ra bîyo û serra 2016’î ra nat girewte yo. Çinkiliçî yew muktube erşawite û mektuba xo de bale ante sebebanê grevê vêşanîye ser.

Qaso ke Çinkiliçî mektuba xo de nuşnayo, heman hepisxane de o û 5 hevalê ey, 16’ê Kanuna 2018’î ra nat grevê vêşanîye de yê. Çinkiliçî derheqê weşîya xo û embazanê xo de va, hetê weşîye ra sey zeîfbîyayîş, bêhalî,dejê sereyî problemê ma estê la hetê moralî ra rewşa ma ca de ya.

Çinkiliçî mektuba xo de qalê tecrîdê serê Ocalanî kerd û wina va:“ No tecrîd tena serê Rayber Ocalanî de nê, serê pêro hêzanê demokrasî, ciwan û cinîyan ser yeno caardene. Tecrîd çiqas ke bibo giran, faşîzm zî handê aver şono. Tecrîd çiqas ke bêro şikitene, faşîzm zî handê yeno şikitene. Naye ra zî, seba ke ma faşîzmî ra bixelisîye, ganî miheqeq tecrîdî bişiknîme.“

Çankiliçî mektuba xo de wina dewam kerd:“ Bitaybetî zî sîyasetmedarê ma ganî bi sînoranê sazîyan tê nêgerê û bi serkeşîya xo şarî bivejê meydananê xoverdayîşî. Her çi eşkera yo. Waştena şarê ma û ê hevalanê ma yê xoverdayoxan eşkera ya. Seba naye zî pratîk hewce keno. ‘Çalakîya roceyê mergî yê 14’ê Temuze û çalakîya şima nêeşkenê roja ma tarî bikerê‘ seba ma referans ê. Ma do tecrîdî bişiknê, ma do faşîzmî bişiknê.“