Xeylî şerwanan koyanê Kurdistanî de û bajaran de ciwîyayî, sîleh xebitnayî, gonî rijnayî û can dayî. Bajarê serewedartişan Nisêbîn zî rîpelanê tarîxî de bi şerwananê xo cayê xo girewt. Nûjiyan Bagoke ma rê qalê xoverdayîşê Nisêbînî yo ke dewleta Tirkî hemverê Kurdan de heme hêzê xo yê şerê taybetî xebitnabî kerd.

 ‘MA ZANAYÊNE Ê DO VERÊ XO BIDÊ NISÊBÎN’

Bagoke vat ke aye 2015 ra nata Nisêbîn de ya. Bagoke ard ziwan ke înan sere de mehleyan de barîkatî ronayê û peyê barîkatan de zî xendeqî adayê. Bagoke nê vatî : “Sere de ma bi sî û molotofan nêverda ke şar dekewo mehlayan. La gama ke dişmenî bi heme teknîkê xo hêriş kerd ma mecbûr mendî ke sîleh bixebitnê.

Ma zanayêne ke do xoverdayîşê Cizîre, Sûr û Şirnexî ver bi Nisêbînî bêro. Çi bîyêne wa bibîyêne ma do çok nêdayêne ro. Çalakîyê ma bî pîl. Heta Adare ma wina dewam kerd. La 13ê Adare de dewleta Tirkî qedexeyê vejîyayîşê teberî îlan kerd. Awe û elektrîkê mehlayan birnayî û bi obus û hewanan hêriş kerd.” 

 ‘FERMANDARÊ XOVERDAYÎŞÎ XEBATKAR’

Bagoke dewam de nê vatî: “Rixmê heme hêrişan de înan hemverê xoverdayoxanê ke binê fermanê Şehîd Kawayî de bî nêeşkayî aver şirê. Artêşa Tirkî ya faşîste şerwananê Kurdan ra tersayêne. Dewleta Tirkî çareyê xo bi teyareyanê şerî bombardûmankerdişê Nisêbînî de dî.

Embaz Xebatkar bi karakterê xo mîyanê ma de motîvasyon û moral viraştêne. Gama ke ma xo pey de antêne embaz Xebatkar hem linga xo ra hem zî mîyaneyê xo ra birîndar bibi. Rixmo ke embaz Xebatkar birîndar bibi zî ê ma ra vat ‘şima rakewê, şima do meşte senî nê şaristanî ra vejîyê ser o planan virazê. Seba nê zî ganî şima biarisîyê.’ Ê heta serê sibayî bi tena sereyê xo nobete girewte. La seba ke birîndar bibi û vatibi beno ke ez embazan rê bibî bar ê xo feda kerd û waşt ke çar embazê ci bixelisyê.” 

DEMÊ PEY DE ANCÎYAYÎŞÎ

Bagoke peynî de nê vatî: “Embazê ke mehlaya Alîka de bî rayîrêk dîbi û resayîbî gerîlayan. Înan di embazî zî seba xo pey de antişî şirawitibî verê ma. Sere de 6 embazî ma ra bî cîya. Nê embazan ra di embazî resayî embazanê koyî. Pey de ma 13 kesî mendî. Gama ke dişmenî mîyanê mehlayan de kontrolî kerdêne grûbêk ma hemverê înan de kewte şer. Na grûbe ra tayê embazê ma şehîd kewtî, tayê zî bi birîndarî esîr kewtî destê dişmenî; embazêk ma zî nê pêkewtişî ra bi saxî resa embazanê koyî. Ma grûba tewr peyêne bîyî. Ma çemberê dişmenî şikna û resayî embazanê xo yê koyî.”

Dimayo ke ma xoverdayîşê tarîxîyî yê Nisêbînî ke tede artêşa Tirkî vîndîbîyayeyê vêşî dabî goşdarî kenê, ma raywanîya xo ya koyan domnenê.