Dewleta Tirkî ya îşxalkare perey hemverê Mexmûr û Şengalî de hêrişo hewayî viraşt. Bombardûmanê teyareyanê şerî yê Tirkî de 4 cinîyî ameyî qetilkerdene. Farîsogullariyî gefê Erdoganî yê hemverê Kurdan ard vîrî û wina vat: “Dimayê gefanê Erdoganî ra hêrişî virazîyayî. Netîceyê bombardûmanî de 4 hemwelatijê ma şehîd kewtî. Her kes zano ke Kampa Mexmûrî binê kontrolê NYyî de ya.”

GANÎ NY Û HUKMATÊ IRAQÎ REAKSÎYONÊ XO RAMOJNÊ

Farîsogullariyî ard vîrî ke şarê Mexmûrî 24 serrî yê raştê zextanê PDK û dewleta Tirkî yenê û qiseykerdişê xo wina da dewamkerdene: “PDK û dewleta Tirkî tim Mexmûr xo rê hedef girewt. Serra 1998 ra nata Mexmûr binê kontrolê Neteweyê Yewbîyayî de yo la ancî zî çende reyan raştê hêrişan amî.

Tirkîye sînorê Iraqî ra ravêrena û hêrişê kampe kena. Par zî 6ê na menge de hêriş amebi kerdene û 5 hemwelatijanê ma cuya xo vîndî kerdebî. Kampe kontrolê NY, Iraq û Hukmatê Başûrî de ya. Nê hêrişî bi hemkarîyêka leymine ameyê viraştene.”

 ‘HÊRIŞ HEMVERÊ QEZENCANÊ KURDAN DE YO’

Farisogullariyî bale ante ke nê wextanê peyênan de hêrişê hemverê qezencanê Kurdan hîna bîyê vêşî û wina qisey kerd: “Dewlete her hetî ra hêrişê Kurdan kena û bi nê hawayî wazena ke qezencanê Kurdan raşte ra wedaro. Kurdî kamcîn dewlete de bibê zî seba înan ferq nêkeno. Hêrişê wehşîyî yê ke serê Mexmûrî de virazîyayî zî delîlê nê yê.

Ma veng danê hemeyê rayapêroyîye û sazîyanê mîyanneteweyîyan ke hemverê nê hêrişanê wehşîyan ê dewleta Tirkî de vejîyê. Ganî Başûrê Kurdistanî zî bêvengîya xo xira bikero û ercanê xo yê neteweyîyan rê wayîr vejîyo. Bêvengîya PDKyî persan ano vîrê merdimî. Ganî selahîyetdarê PDKyî hemverê nê qirkerdişî de reaksîyon ramojnê.”