Hîrê serran de 332 reyî qedexeyê tebervejîyayîşî îlan bi

Weqfa Heqanê Merdiman ya Tirkîya (TÎHV) raporêk aşkere kerd û derheqê qedexeyê tebervejîyayîşî de melumatî dayî. Goreyê raporî mabênê 16ê tebaxa 2015 û 1ê teşrîna verêna 2018î de pêro pîya 332 reyî qedexe ameyo îlan kerdene.

Weqfa Heqanê Merdiman ya Tirkîya (TÎHV) derheqê qedexeyê tebervejîyayîşî de raporêk eşkera kerd. Goreyê naye dewrê destpêkerdişê qedexeyê tebervejîyayîşî yê bêwextî yê tewr verêne 16ê tebaxa 2015î ra heta 1ê teşrîna verêna 2018î bi temamî 11 bajaran û en tay 50 qezayan de tewr tay 332 reyî qedexeyê tebervejîyayîşî ame îlan kerdene.

Hîre bajarê verêne ke qedexe ame îlan kerdene Amed, Mêrdîn û Colemêrg bî.

Goreyê bajaran hûmara qedexeyan wina ya:

Amed 190, Mêrdîn 53, Colemêrg 23, Şirnex 13, Bedlîs 18, Mûş 7, Çewlîg 7, Dêrsim 6, Êlîh 6,

Xarpêt 2, Sêrt de 7 reyî qedexe ame îlan kerdene.

Nê qedexeyan tewr tay 1 mîlyon 809 hezar kesan ser o têsîr kerd

Goreyê eşkerayîya TÎHVî qedexeyan ra verê nê cayê ke tede qedexe amebi îlan kerdene, tewr tay 1 mîlyon 809 hezar kesî nê cayan de mendênê.

Eşkerayîye de ame vatene ke heqê azadîye, ewleyîye, pêserameyîş, rêxistinbîyayîş, îtîqat, zanayîş girewtiş û dayîş, perwerde û xeylê heqê bînî yê şarî ameyî îxlal kerdene.