Merkezê Çapemenî û Îrtîbatî yê HPGyî bi eşkerayîyêka nûştekîye da zanayene çalakîyanê ke qezayanê Colemêrgî Çelê û Gever de hemverê artêşa tirkî de ameyî viraştene pêro pîya 13 leşkerî ameyî kiştene, 1 dozer, 3 stargeh û 3 mewzîyî zî ameyî îmhakerdene.

Eşkerayîya HPGyî wina ya:

“ÇELÊ DE ÇALAKÎ: 7 LEŞKERÎ AMEYÎ KIŞTENE

Roja 27ê Teşrîna verêne saet 11.30 de hêzanê ma hemverê artêşa tirkî ya îşxalkare ke xo qilê Şehîd Colemêrgî yê qezaya Çelê ya Colemêrgî de bica kerdîbî çalakîyêk viraşte. Na çalakîya ke tede mewzîyê dişmenî, stargehî û makîneyê karî yê ke qilî ser o bî 2 hetan ra bi hawayêkê bitesîrî ameyî panayene, naye de 1 wesayîtê dozerî, 1 mewzî û 2 zî stargehî bi temamî ameyî îmhakerdene. Netîceyê çalakîye de qaso ke ame tesbîtkerdene 7 leşkerê dişmenî ameyî kiştene. Çalakîye ra dima artêşa tirkî ya îşxalkare herême raşte raşt bi obus û topanê hewanî bomba kerdî.

GEVER DE 2 HETÎ RA ÇALAKÎ: 6 LEŞKERÎ AMEYÎ KIŞTENE

Hêzanê ma roja 26ê Teşrîna verêne saet 09.30 de hemverê leşkeranê îşxalkaran ê ke xo qilê Elîşêr ê pabesteyê qezaya Geverî ya Colemêrgî de bica kerdîbî çalakîyêk viraşte. Mewzî û stragehê ke qilî ser o bîyî 2 hetan ra bi hawayêkê bitesîrî gîrîyayî binê gulevaranî, çalakî de 1 stargeh û 2 mewzîyî bi temamî ameyî îmhakerdene, qaso ke ame tesbîtkerdene 6 leşkerî ameyî kiştene.   

ARTÊŞA TIRKÎ RA OPERASYON Û SEREŞTIŞÊ KEYEYAN

Roja 24ê Teşrîna verêne artêşa tirkî ya îşxalkare dewanê Pîrejman û Heftenîn yê pabesteyê qezaya Pîranê Amedî yê de operasyonêk da destpêkerdene. Yewîyanê dişmenî herême de eşt xeylî keyeyan ser û zext û şidet tetbîq kerd. Hêzanê îşxalkaran 25ê Teşrîna verêne de saetanê şanî de bi hawayêkê bênetîceyî xo herême re apey ant.

HEMVERÊ WAREYANÊ PAWITIŞÎ YÊ MEDYA DE HÊRIŞ

Roja 27ê teşrîna verêne teyareyanê şerrî yê Tirkîye qilê Şêx Nasirî yê pabesteyê herêma Qendîlî saetanê mabênê 10.00 û 11.00 de bomba kerd. Heman rojê de saet 17.30 û 19.30 de teyareyanê şerrî wareyê Şehîd Rustemî ke pabesteyê herêma Zapî yo bomba kerd. Netîceyê ê bombardûmanan de vindîbîyayîşêkê gerîlayanê ma nêvirazîyayo.”