HPG-BÎMî dewamê eşkerayî de da zanayene ke hêzanê gerîla Çelê de çalakîyêk viraşta, yewîyanê nimiteyan ê artêşa tirkî zî Bêşebab de operasyonêk dayo dest pêkerdene û teyareyê şerrî yê tirkan zî herêmanê gerîlyan ser o hêrişan virazenê.

ÇELÊ DE HEMVERÊ MEWZÎ Û STARGEYÊ ESKERÎYAN ÇALAKÎ

Eşkerayî de çalakîya gerîlayan a ke Çelêya Çolemêrgî de amî viraştene ser o ca dîya nê detayan: „Çarçiwaya Hemleya Şorişgêre ya Şehîd Pîroze û Şehîd Agirî de hêzanê ma roja 15ê Teşrîna verêne saet 16.00 de hemverê qilê Koordîneyê girêdayeyê qezaya Çelê ya Çolemêrgî de çalakîyêk viraşt. Na çalakîya ke mewzî û stargeyê dişmenan ameybî hedefgirewtene, hûmara leşkeranê kişte û birîndaran nêamî tesbîtkerdene. Çalakîye ra dima artêşa tirkî ya îşxalkare bi obus û topanê hewanî herême bombe kerda. Netîceyê bomberdûmanî de cayê daristanî de şewat vejîyayo.“

FARAŞÎN DE BI YEWÎNEYANÊ TAYBETÎYAN OPERASYON

HPG-BÎMî da zanayene ke herêma Faraşînî ya Şirnexî de damî yenê ronayene û vat „Roja 11ê Teşrîna verêne saet 11.30 de artêşa tirkî ya îşxalkare herêmanê Çelê Reş, Firat Belyas û Tirşinê ya herêma Faraşînî ya qezaya Bêşebabî ya Şirnexî de operasyonêk dayo dest pêkerdene. No operasyono ke hewna zî dewam keno, ê de hêzê nimiteyî arazîye de daman nanê ro.“

HEMVERÊ HERÊMANÊ GERÎLAYAN DE HÊRIŞÊ HEWAYÎYÎ

HPG-BÎMî heman wextî de da dîyarkerdene ke artêşa tirkî Wareyanê Pawitişî yê ke binê kontrolê gerîlayan de yê ser o hêrişê hewayîyî viraştê û nê haydarîyî pare kerdî:

„Roja 15ê Teşrîna verêne saet 14.30 de teyareyanê şerî herêma Sîda ya girêdayeya Zapî bombe kerdî. Roja 16ê Teşrîna verêne (ewro) saet 03.00 de zozanê Avaşîne ke girêdayeyê herêma Avaşîne yê, saet 09.20 de zî ancî wareyê Mervanosî yê herêma Avaşîne û wareyê Şikefta Birîndara û  Gundê Fillaha yê herêma Zapî bombe kerdî. Nê bomberdimanan de vindîbîyayîşêkê gerîlayan çîn o.“