Endamê Konseya Rayberdişî ya KCKyî Mustafa Karasuyî Qirkerdişê Mereşî ANFyî rê ercna

Karasuyî sere de ê ke Qirkerkerdişê Mereşî de ameyî qirkerdene bi hurmet yad kerdî û qala şertanê  ê dewrî kerd. Karasuyî vist vîrî ke serra 1978 de Tirkîye de krîzêk estbî û heman wextî de xoverdayîşê şaran ê vera faşîzmê dewleta Tirkî estbi û va: ‘‘Qirkerdişê Mereşî demêkê winayênî de ame viraştene. Senî ke ma cuwa pê eşnawitê, Qirkerdişê Mereşî provaya faşîzmê 12ê Êlule bi.‘‘

PLANÊ TIRKKERDIŞÊ ROJAWANÊ FIRATÎ

Karasuyî bale ante derbeyanê hukmatê faşîstî û vat ke Qirkerdişê Mereşî plankerde ame viraştene û wina dewam kerd: ‘‘ Wextê ronayîşê Tirkîye ra seba asîmîlekerdiş û tirkkerdişê Kurdan ê ke rojawanê Firatî de yê planêk ameyo hadrekerdene. Çîyê ke planê Şark Islahatî de ameyî hedefkerdene Qirkerdişê Mereşî de vejîyayî orte. Xora  qirkerdiş ra dima herêmanê sey Mereş ,Meletî, Semsûr, Siwas, Erzîngan û Dêrsim de  nufusê Elewîyan bîyo kêmî. Elewîyan metropolan û Ewropa rê koç kerd. Rojawanê Firatî de Kurdî û Elewîyî bîyê kemî.

QIRKERDIŞ BADÊ RONAYÎŞÊ PKKYÎ AME VIRAŞTENE

Karasuyî bale ante ke dimayê ronayîşê PKKyî qirkerdiş ameyo viratene û va: ‘‘Têgêrayîşê Kurdan  ronayîşê xo ra dima  zaf lez bi vila. Qirkerdişê Mereşî heman wextî de vera averşîyayîşê têgêrayîşê PKKyî zî cevabêk bi.

GANÎ ELEWÎYÎ HERRA XO RÊ AGÊRÊ

Karasuyî  muhîmîya girdkerdişê xoverdayîşî ser o vindert û vat ke wazîfeyê Elewîyan, hetanê demokratan û têgêrayîşê Kurdan planê nê qirkerdişî pûçvetiş o û seba naye zî sere de Elewîyê ke erdê xo ra ameyî raqilnayene ganî ê pêser herra xo rê agêrê.‘‘