Endamê Konseya Rayberdişî ya KCKyî Mustafa Karasuyî  bi wesîleya serrgêra Qirkerdişê Roboskî  ANFyî rê qisey kerd.

Karasuyî vat:  ‘‘No qirkerdiş bi zanayîş ame viraştene û selahîyetdaranê dewlete zî no îtîraf kerd. Ê bi xo vanê; mîyanê înan de PKK ra yew bibo! Yanî semedê yew endamê PKKyî 34 domanî qetil benî, beno ke 34 hezar kesî zî yenî qetilkerdêne! No îtîrafê sucî yo.‘‘

KURDÎ RÊ NÊZDÎBÎYAYÎŞ O

Karasuyî  wina dewam kerd: ‘‘No esasî de nêzdîbîyayîşê dewleta Tirkî yê Kurdan o. Xoverdayîşê xoîdarekerdişî yê 2015-2016 de zî cinî û domenî zî tede bi seyan sivîlî hetê înan ra ameyî qetilkerdene. Qirkerdişê Roboskî bi destê rejîmê Erdoganî bi. Xora o wext AKP bi Fetullah Gulenî semedê  qirkerdişê Kurdan hadreyîya  planê tasfîyekerdişî yê ‘modelê Srî Lanka‘ kerdêne.

FERMANÊ QIRKERDIŞÊ ROBOSKÎ  ERDOGANÎ DA

Fermanê qirkerdişî Erdoganî da û dima ra kiştoxî pîroz kerdî. Eke o bi xo mîyanê naye de nêbîyêne  wina eşkera  qirkerdişê domanan  rê wayîr nêvejîyayêne. Erdogan seba ke semedê sucanê xo yê girdan mêro muhakemekerdiş  wazeno ke tim îqtîdar de bimano. Parlamenterê HDPyî yo Roboskîyij  Ferhat Encu zî bi sebebo ke her ca de qirkerdiş tehşîr keno û sucê Erdoganî ano ziwan ame cezakerdene.‘‘

KURDÎ GANÎ XOVER BIDÎ

Karasuyî qiseykerdişê xo wîna qedîna: ‘‘AKP û Erdogan semedê îspatkerdişê dişmenya xo yê veva Kurdan ganî hinî se bikerî?  Rixmê nê qirkerdişan tayî Kurdî hema rey danê AKPyî  tewrê înan têgêrênî. No nasname û şarê xo rê îxanet o. Tehdîtê îşxalê Rojawanî, hêrişê serê Şengal û Mexmûrî û Roboskî heme pabesteyê yewbînan ê. Eke Kurdî nêwazenê raştê qirkerdişî bêrî, tena rayîrê înan xoverdayîş o. Bê xoverdayîşî nêeşkenî esbîyayîşê xo bipawî. Dişmen bihêz nêyo. Eke xoverdayîş bibo, emrê înan kilm o. Coka hem zere de hem zî teber de hêriş keno. Ganî hêzê demokrasî û şarê Kurdî na raştiye bivînî . Roj roja mucadeleyî ya.‘‘