Endamê Komîteya Rayberdişî yê PKKyî Murat Karayilanî programo taybet ê Stêrk TVyî rê komploya 9ê Têşrîna verêne û meseleyanê rojdemî ser o qisey kerd.
KOMPLO NÊRESA HEDEFÊ XO LA YENA DEWAMKERDENE
Karayilanî derheqê komplo de nê vatî: ''20 serrî yo ma vera komploya mîyanneteweyîye têkoşîn danê û nê demî de xoverdayîşê destanî ameyî cuyayene. Sere de têkoşînê Rayber Apoyî û yê gerîla û şarê ma komplo pûç vet û xeta Rayber Apoyî de Têgêrayîşê Azadîya Kurdîstanî tewr tay deslab hêz girewt. La ma nêşkayî komplokaran temamî de bin bifînî. Na zî seba ma meseleya xorexnekerdişî ya.‘‘
MHME Û CPTYÎ ÎŞKENCEYÎ RÊ HEMPAR Ê
Karayilanî bêvengîya dezgehanê Ewropa rê zî hêrsê xo ard ziwan û wina domna: ‘‘Komîteya Vernîgirewtişê Îşkenceyan (CPT) û Mehkemeya Heqê Merdiman ya Ewropa (MHME) bi kerdenanê xo yê peyênan ramotê ke ê hemparê sîstemê îşkenceyî yê. Qewimîyayîşê ke ewro Îmrali de benî goreyê qeydanê ehlaqî û huqûqî nêyî. La rixmê naye qeraro peyên yê MHMEyî ney bîyayişan meşrû keno. Hetêk ra qala heqê merdiman kenî hetêk ra zî wina qerar genî. Heqê ke seba her kesî estî seba şar û Rayberê kurdan çîn ê. Eşkerayo ke têkoşînêko hempar o birêxistin yê şaran nê tecrîdî dano wedartene. Ganî ma 20 serran ra ders vejê û goreyê naye têbigêrê‘‘
OPERASYONÊ PEYÊNÎ NORMAL NÊYÎ
Karayilanî operayonê qirkerdişê sîyasî ke rojanê peyênan de zêdyayî nînan ser zî wina va: ‘‘Operasyonê 9ê Teşrîna verêne tesaduf nêbi. Dewlete naye ser zaf vindeta, roje bi roje plan kerda û sey dewamê komplo hêriş kerd. Waşte ke mesajê dewamkerdişê komplo bidî. Sebebo bin zî; xora ê zanê na roje de Kurdîstan û Tirkîya de şar vera komplo çalakîyan virazeno û waşt ke vernîya naye bigerî. Eşkera yo ke nê operasyonî bi talîmatê Erdoganî ameyî viraştene. ‘‘
GANÎ CAYÊ TÊKOŞÎNÎ BÊRÎ HÎRAKERDENE
Karayilanî şarî ra waşt ke wa wayîr îradeyê xo bîvejî û va: ‘‘Dewlata tirkî tarîxî ra heta ewro vana ke ‘şima se kenê bikerê çîyêko bêmehne yo. Ma sey dewlete şima ra jîhatêr î. Ma hêzê şima şiknenî û teslîm genî.‘ Dewleta tirkî wina qeyde 95 serrî yo kurdan ser o şerro taybet dana domnayene. Şarê kurdî ra vanê ke eke şima îradeyê xo bivîjnî, ma zî qeyûm tayîn kenî. Çareyêk bîn ê şima çîn o. Şima ma rê mecbûr ê. Şarê ma zaf hol fam keno kê nê çi vanê. Wazenê ke îradeyê ma bişiknî. Ganî şarê ma vera naye şori sindoqan ser û weçînayîşî sey sahayê têkoşînî bivînî û vera înan xo ver bidê. Verî kesî îradeyê kurdan temsîl nêkerdêne coka şarê kurdî qîmet nêdayêne weçînayîşan la nika wina nîyo. Nika safê têkoşînê azadîya kurdî hîra bîyê û sîyaset de zî temslîkarê kurdan estî.‘‘
GERÎLA GOREYÊ TAKTÎKÊ DEWRÎ ÇALAKÎYAN VIRAZENO
Karayilanî têkoşînê gerîlayan ser o zî nê vatî: ‘‘Dewleta tirkî şerro taybet virazena. Vîndîbîyayênê xo nimnena xo sey serkewtî ramojnena. Artêşa tirkî rixmê şuxulnayîşê heme teknîk û îmkananê dewletî vera gerîlayan binkewtî ya. Xora çalakîyê peyênî sey Çelê, Gêman û ê bînan ra zî eşkera yo ke gerîla bi çalakîyanê gird û bitêsîran mîyaneyê dişmenî şikneno. Gerîla goreyê taktîkê dewrî çalakîyan virazeno û serkewtiş fîneno dest.‘‘
GERÎLA TEMÎNATÊ AZADÎYE Û DEMOKRASÎ YO
Karayilanî qiseykerdişê xo rê wina dewam kerd: ''Gerîla tena seba şarê kurdî nê seba heme şarê herême têkoşîn dano. Polîtîkaya îşxalkarî ya dewketa tirkî kurdan a pîya seba pêroyê şarê ereb, tirk, asûrî û sûryanî bitehluke ya. Coka têkoşînê gerîla seba şarê herême muhîm o. Erdogan vano ke ez bi vêşanverdayîşî gerîla qedênena. Payîza 2016î û Nîsana 2017î de vatêne ke no zimistan PKK do biqedîyo. Eke gerîla bi zexîre biameyêne qedênayene, 35 serrî yo qedyabi. Ez zelal vajî ke gerîla do hetê zexîre ra tengayî meanco.‘‘
ERDOGAN VERVATOXÎYA ÇETEYAN KENO
Karayilanî pêkerdişê Îdlîbî yê Tirkiya û Rusya zî vist vîrî û va: ‘‘No pêkerdiş seba demêkê kilmî yo. Erdoganî serekanê Soçî û Rusya ra waşt ke heta wisar Îdlîb binê kontrolê ey de bimano. Erdoganî heme sîyasetê xo goreyê aşma Adare hesab kerdo. Zano ke eke weçînayîşî ra verî Îdlîbî ra vejîyo, vîn keno. Ewro Îdlîb de Erdogan vervatoxê çeteyanê El Nusra keno.‘‘
EFRÎN DE PAKKERDIŞO ETNÎKÎ
Karayilanî derheqê qewimîyayîşanê Efrînî de zî nê vatî: ‘‘Şarê Efrînî cayê xo ra yeno fetilnayene. La hêzê mîyanneteweyî tena ewnîyenî tira û vera naye çîyêk nêkenî. Xora Efrîn de sucê merdimîye yeno kerdene. Dezgehê heqê Merdiman bibî qaşo, hey ça de yê? Wa her kes naye hol bizano ke hesabê nê pêrune yeno persayene.‘‘