Endamê Komîteya Rayberdişî ya PKK’yî û fermandarê Merkezê Pawitişî yê Şarî (MPŞ) Murat Karayilan bi meymanê Programê Taybetî yê Stêrk TV’yî. Karayilanî persê Rosîda Mardîne rê cewabî dayî û derheqê komploya 15’ê Sibate ya 1999’î ya mîyandewlete de û çalakîyanê grevê vêşanîye yê ke hemverê tecrîdkerdişê Rayberê Şarê Kurdî Abdullah Ocalanî de yenê domnayene de îzahatê muhîmî kerdî. Karayilanî vat, “Hendî vateyî rê ca nêmend, kardî resaye esteyî, ganî têgêrayîşê wicdanî dest pê bikero.”

Karayilanî ard ziwan ke averşîyayîşê serra 2019’î do morê xo bido serranê ameyoxan ro û ê hedef kenê ke serrgêra 21’ine ya komploye de a bi temamî perçe bikerê. Karayilano ke qiseykerdişê xo rê bi vîrardişê Mîr Tehsîn Begî dest pêkerd vat, “Tîya ra çend rojî verî mîrê şarê ma yê Êzidîyan Mîr Tehsîn Begî wefat kerd. Sere de ez keyeyê merhûm Mîr Tehsîn Begî rê, şarê ma yê Êzidîyan û hemeyê şarê Kurdistanî rê serweşîye wazena, dej û kederê keyeyê ci pare kena.”      

VENGDAYÎŞÊ BI YEWÎYA NETEWEYÎYE

Karayilanî vengdayîşê seba yewîya neteweyîye tekrar kerd û vat, “Gama ma seba yewîya neteweyîye veng danê wa çew nêvajo ke ma înan ra vanê wa bêrê ma het de şer bikerê. PKK qaso ke lazimîya ci esta şer keno. PKK şerî ra nêterseno. Çunke hêzê şerî yo û fedaî yo.”

Karayilanî vist vîrî ke 20 serrî komploye ser ra ravêrtî û vat, “Ez ê çalakwananê ke bi çalakîyanê ‘Şima nêeşkenê rojê ma tarî bikerê’ şehîd kewtî bi hurmet bi vîr ana. Nê 20 serran de xoverdayîşêko birûmet bica ame. Ez şexsê Erdal, Adîl, Nûda, Vîyan, Delal, Atakan û Zekî Şengalîyî de heme şehîdanê ma bi vîr ana.” Çend nuqteyê serekeyî yê qiseykerdişê Karayilanî wina yê:

“Şarê ma û têgêrayîşê ma seba ke komplo nêreso amacê xo, xoverdayîşêko xurt kerd. Bi saya tewirê Rayber Apoyî yê zîndanê Îmraliyî û bi paradîgmaya newî, bi xoverdayîşê qehremananê ma û fedakarîya şarê ma, komplo bi ser nêkewte. Amacê komploye no bi ke têgêrayîşê ma tasfîye bikerê. Ma nê 20 serran de komplo şikite, la ma nêeşkayî a raste ra wedarê. Înan heta Lozan vatêne do Kurdistanêk bêro awankerdene la se bi? Înan welatê ma kerd çar perçeyî. Ma verî ra zanê ke tewirê welatanê Ewropa hemverê şarê ma de negatîf o. Seba çareserîye tu cehdêk înan çino. Rayber Apo serra 1998’î de seba çareserkerdişê problemî bi rayîrê aşitîye şi Ewropa. Serekwezîrê Îtalyayî Massîmo D’Alemayî no heqîqet dî û seba çareserkerdişê dewaya Kurdan Ewropa de gêra. La heme dewletanê Ewropa na çareserî red kerde. Bêguman Amerîka serkêşîya komploye kerde û dewletanê Ewropa zî bingeyê nê çîyî hadre kerd.”

DEWAYA KURDAN PROBLEMÊKO MÎYANDEWLET O

Nizdbîyayîşê nê dewletan hewna nêvurayo. Dewletê winayênî û koalîsyono mîyannetewe panc serrî yo ke hemverê DAÎŞ’î de şer kenê. Hemverê DAÎŞ’î de Kurdan Efrîn ra heta Kerkuk şer kerd. La nê hêzan tewirê xo yê hemverê Kurdan nêvurnayo. Ma Kurdî tena mexdûrê dewletanê Tirk, Ereb û Farisan ê. Ma mexdûrê dewletanê mîyanneteweyan ê zî. Dewaya Kurdan naye ra problemêko mîyandewlet o. Çunke bi pêkerdişêkê mîyandewletî Kurdî ameyê înkarkerdene. Bi mucadeleyê ma tewirê nê dewletan tayê vurayo, la bi temamî nêameyo vurnayene. Nika tayê selahîyetdarê Başûrê Kurdistanî kenê ke nê halî ra îstîfade bikerê la no şaş o. Çunke şaro Kurd heqê ci esto ke nê erdan ser o bi azadîye biciwîyo. La tirêm dewleta Tirkî ya îşxalkare bi çi heqî yena erdê ma îşxal kena ? Erdogan her roje vano ‘Ez do bikewî uca, ez do uca îşxal bikerî.’ La çew Erdoganî ra nêvano ‘Kurdî şarêko kan ê nê erdan ê, wazenê bi kultur û ziwanê xo serê nê erdan de biciwîyê, tirêm ti çira naye xo rê sey tehluke vînenê’ Eşkenê vajê, la seba menfaatanê xo nêvanê. Çunke ê bi xo înkarkerdişê Kurd û Kurdistanî bica anê. Hetêkê komploye zî no yo.

Hemverê komploye de nuqteya ma xirab nêya. Komplo hendî zihîf bîya. Înan tewr peynî seba tepiştişê hîrê hemreyanê ma xelata pereyan daye û waşt ke Rojawanî pêşkêşê Tirkîya bikerê. La şarê ma hemverê nê de reaksîyon da û komplo zihîf bîye. Çend rojan verî muracatê derheqê Xoverdayîşê Cizîrê yê MHME ame redkerdene. Cizîrê de vernîya çimanê merdiman de 137 merdimê ma ameyî vêşnayene. No qirkerdiş sûcêkê merdimîye yo. La MHME vat ke hewna ‘Rayîrê huqûqî yo zereyên nêameyo qedînayene’ û dewa red kerde. Ma zî vanê ‘Eke Tirkîya de huqûq estbo, tirêm çira no huqûq Îmraliyî de nêno bicaardene? Goreyê huqûqê Tirkîya her tepişte eşkeno keye û avûkatanê xo dir bêro têhet. Tirêm çira no heq Îmraliyî de bica nêno? Konseya Ewropa zî sextekarîye kena. Qaşo ganî CPT vernîya îşkenceyî bigîro. La ça yo? Sextekarîye kenê û ewnênê menfaatê xo ra. Ewro vernîya CPT’yî de 14 kesî 57 rojî yo ke grevê vêşanîye de yê. Tirêm çira nê çîyî nêvînenê?   

HEMLEYA GREVÊ VÊŞANÎYE QÎRAYÎŞÊ CIMATÎ YO

Çalakîyê grevê vêşanîye bi qerarê organîzasyonî dest pê nêkerdê. Merdiman xo rê bi îradeyê xo yê azadî dest pê kerdo. Şorişgêra erjayî Leyla Guvene no çî dî û dest bi çalakîye kerde. La no veng qîrayîşê cimatî yo. Grûbî nênê têhet û qerar nêdanê. Her kesêk xo bi xo qerar dano û dest pê keno. Ganî bêro zanayene ke redkerdişê tecrîd û komploye gureyê ma yo. Çîyo ke ganî ma bikerdêne çalakwanê erjayeyî yê şarê ma kenê. Ez reyna heme çalakwananê grevê vêşanîye silam kena. Ewro Leyla Guvene û Nasir Yagiz serkêşê ma yê. Strasbourg de zî 14 embazî grevê vêşanîye de yê. Mesela Mustafa Sarikaya 13 serrîya xo ra mîyanê mucadeleyî de yo û 41 serrî yo ke xover dano. 20 serrî zîndan de mendo. Kedêka pîle daya nê mucadeleyî. Heman wextî de Yuksel Koç, Gulistan Çiya Îke û Kerem Solhan zî kesê winayên ê û nika halê înan giran o la xoverdayîşê xo domnenê. Mesela Îmam Şîş zî Galler de 56 rojî yo ke bi tena sereyê xo grevê vêşanîye de yo. Nê çalakwanî îradeyê cimatî yê şarê Kurdî ramojnenê. Zîndanan de zî hal wina yo û hûmare resaya 300 û çalakîye kewta roja 57’ine. Zîndanan de çalakîya grevê vêşanîye hîna zor o, îradeyêkê pîlî wazeno. Ganî şarê ma û demokratê Tirkîya goş bidê vengê çalakwanan. Tewirê parlamenteranê Kurdan xeylî alelade yo. Ganî bêro dîyene ke no tewirêko zihîf o. Çunke çalakîyî ameyê merheleya krîtîke. Eke şehadetî virazîyê kiştoxê ci Erdogan o. Guvene meclîsê Tirkîya de parlamenter a û 95 rojî yo ke grevê vêşanîye de ya, eke şehîd bibo, kiştoxê aye Erdogan o. Ma halêkê nênormalî de yê. Rayberîye verî zî vatibi, ‘Eke nêeşkenê tu çîyêk bikerê, dua bikerê.’ Kam çi çalakî eşkeno bikero ganî bikero.”      

15’Ê SIBATE DE DO ŞARÊ MA CEWABÊ LAZIMÎ BIDO

“Rîyê şertanê zimistanî ra seba gerîlayan şertê çetinî estê. La hadreyîyê têgêrayîşê ma estê. Bi xoverdayîşê grevanê vêşanîye hemleyêka newî amî destpêkerdene. Ma bawer kenê ke 15’ê Sibate de do na hemle hîna bibo xurt. Gerîla zî do mesajo ke lazim o nê xoverdayîşî ra vejo. Wextê komploye de senî ke şarê ma her ca de werişt, ganî nika zî heman çîyî bikerê.”   

MA ÇALAKÎYA XOVÊŞNAYÎŞÎ QEBÛL NÊKENÊ

“15’ê Sibate de hetê çalakîyan ra tayê xeletîyî yenê kerdene. Gerîla sîlehê xo erd de dano ro û koyan de adir dano wucûdê xo ra û vano ‘Ez dişmenî protesto kena.’ No nêbeno. Organîzasyonê ma qerar da êyê ke wina bikerê ma do înan şehîd îlan nêkerê. Ganî heme embazê ma nê çîyî bizanê. Bi vêşnayîşî wucûdî nêbeno. Ho yo çalakwanî rayîrê raştî ramojnenê, xover bide!

Gerîla ganî çarçiwaya projeyê xoawankerdişî de xo bikero hêzê serfirazîye. Ganî gerîla hadreyîyanê xo goreyê nê bikero. Bi sebir, bi qerardarîye û îradeyêkê pîlî ganî xo serfirazîye rê hadre bikero.”

ÇALAKÎYA ŞARÊ ŞÊLADIZÊ ÇALAKÎYÊKA BIRÛMET A

“Ganî bêro zanayene ke çalakîya şarê Şêladizê çalakîyêka birûmet a. ez şarê Şêladizê silam kena û şehîdanê Şêladizê bi minet bi vîr ana. Ê şehîdê Kurdistanî yê. Tayê çalakwanan ra nika ameyê tepiştene. La ganî bêro zanayene ke ê çalakîyî çalakîyê neteweyî bî. Ganî her het nê wina bizano.

Nê prosesî de eke ma sîyaset û stratejîyêka neteweyîye awan bikerê, do şaro Kurd Rojakewtena mîyanêne de bi ser bikewo. Gama ma seba yewîya neteweyîye veng danê wa çew nêvajo ke ma înan ra vanê wa bêrê ma het de şer bikerê. PKK qaso ke lazimîya ci esta şer keno. PKK şerî ra nêterseno. Çunke hêzê şerî yo û fedaî yo.  

Nika seba ke embazê ma hêrişê qereqolan nêkerê yan zî çîyêkê cîyayî nêkerê, ma bi zehmetîye vernîya înan gênê. PKK hêzêko fedaî yo û çewî ra nêterseno. La seba serfirazîye lazimîya ma bi yewîye esta, bi tewirêkê yewiye esta. Na yewe ra zî ma tim veng danê. Ma umîdwar ê ke tayê kesî do nê vengdayîşê ma rast fam bikerê û do yewîya neteweyîye bica bêro.”