Endamê Komîteya Caardişî ya PKKyî Murat Karayilanî programê taybetî yê Stêrk TVyî de cewab da persanê rojnameger Ciwan Tûnçî.

KONSEPTO NEWE YÊ AKPYÎ ÇINKERDIŞÊ KURDAN O

Karayilanî dîyar kerd ke konseptê dewleta tirkî yê vera kurdan de tehlukeyin o û wina domna: "Qeydeyo ke aseno, tayê dormeyê kurdî û hêzê herêmî nê konseptî hol fam nêkenî. Hêzê tarî û xorînî sey AKP, Ergenekon û MHP çarçeweya konseptêko newe de ardî pêser. Hedefê verênî yê nê konseptî tasfîyekerdişê Tevgerê Azadîya Kurdî yo. Tena PKK nê, pêroyê qezencê kurdan hedef girîyenê. Na raştîye zelal a. Diyîn zî dewleta tirkî tena sinoranê xo de nê, teber de zî wazena herême de rolêko gird kay bikera. Planê nê hêzanê tarîyan tena semedê PKK û kurdan nê, semedê ereb, faris, suryanî, armenî û heme şarê herême tehluke yo. Coka ganî hêzê herêmî vera nînan de bibî yew û pîya têbigerî."

WA TI KES KURDAN SER O BAZARAN NÊKERO

Karayilanî qiseykerdişê xo wina domna: "Dewleta Îranî demo peyên de vera kurdan de dest bi hêrişan kerda. Hêrişê Koyê virazîya, îdamî bîyî, KODAR û PJAK rê hêrîşî bîyî. Dewleta Îranî yew hetî ra hêrişê kurdan kena, heto bîn ra zî kurdan rê nizdîbîyayîş nîşan dana. Esas de konseptê Tirkîya semedî Îranî zî tehlukeyin o. Hedefê Tirkiya o yo ke herême de biba wayîrê vatişî û Sûrîye bigîra binê kontrolê xo. Xora Îran zî eynî çî wazeno. 600 serrî yo ke Îran û Tirkîya vera yewbînî de yî. Nika nêyî vera kurdan de îtîfaq kenê la no reyna agêreno înan ser. Wa ti kes gonîya kurdan ser o bazaran nêkerî. Ne Tirkiya û Îran, ne zî Îran û Amerîka û hêzê bînî. Kurdî wazenê ke heqê ci yê ke xesp bîyê peyser bigîrî û herra xo de bi hawayo azade bicuyê. Heqê cuya ma, destê ma ra girîyayo, meseleya ma na ya."

KURDÎ Bİ YEWBÎYAYÎŞÎ SERKEWENÎ

Karayilanî dîqet ant muhîmîya yewbîyayîşî ser û wina va: "No demo tarîxî de, eke kurdî bi stratejîyêko ortax têmegerê, vînî kenê. Rixmê pêroyê têkoşîn û emego pîl, eke polîtîka û stratejîyêko ortax mebî peynîya ci hol nêbeno. Ez nêvana eke wina bibo ma kurdî tasfîye benê. No zehmet o, la eke kurdî mebî yew no hêz dano dişmenî. Ganî ma naye hol bizanê û goreyê naye têbigerî. Meseleya esasî na ya."

DEWLETA TIRKÎ DEMÊ XO YO TEWR ZEYÎF DE YA

Karayilanî wina dewam kerd: "Planê dewleta tirkî demê dergî de çinkerdişê kurdan o. Demo kilm de zî di hedefê ci estî. Verên; wazena ke şerê Îdlîbî bivindarna û eke mumkun bi ya bi xo wazena hêrîş bikera. Diyîn zî îşxalê Başûrî yo. Coka waşte ke Îran bikera hetkarê xo la senî ke ma zanê sernêkewt. Waştêne ke Başûr de ortaxan bivîna la netîce nêgirewte û tena zî nêewtana aver şorî. Nika binate de menda. Lêlîkan, Tepê Xwedê û Koordîne de her roje darbeyan wena. Bi qala kilme dewleta tirkî demê xo yo tewr zeyîf de ya. Hem meseleya Îdlîbî de kewte tengayî, ameye peynîya rayîrî. Hem zî meseleya Başûrî de kewte tengayî. Seke yeno zanayene krîzê leşkerî, sîyasî û ekonomîke zî estî."

POLÎTÎKAYA ÎMRALI VERA PÊROYÊ KURDAN A

Karayilanî tecrîdê Îmrali ser o zî nê vatî: “Polîtîkaya Îmrali zaf hetin a. Dewleta tirkî çîyê ke Îmrali de kena, ewil zîndananê bînan de û dima zî wazena ke pêroyê kurdan rê bikera. Wazena ke pêroyê kurdan tecrîd bikera. Polîtîkaya Îmrali tena vera yew merdimî de nîya. Şexsê Rayber Apoyî de şarê kurdî rê bena. 11 mîlyon îmzeyî ameyî arê dayene û Bruksel de dîyayî hêzanê Mîyanneteweyîyan. Îşkenceyo psîkolojîk îradeyêko winasî rê kenê. No nizdîbîyayîşê înan yê kurdan îfade keno.”

HETA KURDÎSTAN AZAD MEBO MA XO RA NÊVANE ŞORIŞGÊRÊ DEMÎ

Murat Karayilanî eleqe ant têkoşînê gerîlayan ser û wina va: “Binateyê ma û dewleta tirkî de şerêko gird esto. Şer tena Tirkîya û Vakurê Kurdîstanî de nêbeno. Eynî wexte de Başûrê Kurdîstanî de beno. Reyna Efrîn de şarê ma vera dewleta tirkî de şerêko gird dano. Ewil Efrîn û dima ra pêroyê Kurdîstan binê îşxalî ra nêxelisîyo û azad nêbo ma xo ra nêvanê şorişgêrê demî.”

Karayilanî qiseykerdişê xo wina qedêna: “No demêko zehmet o. Xora nê deman de her kes beno eşkera. Demo hîra de herkes qal keno û eşkeno çîyêk bikero. La no dem de ganî yê ke qerarin û wayîrê îradeyê xurtî yî xo no nîşan danî û destê xo erzenî binê kerraye. Ganî cinî û gencî binena berpirsîyarîye bigîrî. Eke no şer bireso serkewtişî Kurdîstan de peynîya zilm û îşxalî yena.”