KCD: Çalakîya Guvene Walîtîya Amedî tersnaye

KCDyî vera qerarê ‘qedexeyê çalakîyan yê 15 rojan’ yê Walîtîya Amedî reaksîyon ramot û da zanayene ke no qerar vera xoverdayîşê Guvene ameyo girewtene.

Kongreya Demokratîke ya Komelî (KCD) derheqê qerarê qedexekerdişê çalakîyan ê Walîtîya Amedî eşkerayîyêka nuştekîye daye.

Eşkerakerayîye de ca dîya nînan:

''Çalakîya grevê vêşanîye yê bêdem-bêvurayîşî ya Hemsereka ma Leyla Guvene ke bi waştişê wedartişê tecrîdê serê Rayberê Şarê Kurdî Brêz Abdullah Ocalanî  yena viraştene, resaye roja 10ine.

 Walîtîya  Amedî eşkerayîya çapemenî ya ke organîzasyonanê komelî yê sivîlan û partîyanê sîyasîyan semedê paştdayîşê Guvene organîze kerdêbî behane kerde û seba 15 rojan çalakî û aktîvîteyî qedexe kerdî. Ma nê qerarî antîdemokratîk vînenî û protesto kenî.

Hemsereka ma Leyla Guvene bi na çalakîya vêşanîye ya ke daya destpêkerdene, veng dayo wijdanê komelê neteweyîye û mîyanneteweyîye. Ma bawer kenê ke  heme raya pêroyî ya demokratîke do cewabêkê xurtî bido nê vengî û goreyê naye tê bigêro.’’