Hemserekîya Konseya Rayberdişî ya KCKyî derheqê qerarê serekê Amerîka Donald Trumpî yê antişê yewîyanê Sûrîye de eşkerayîyêka nûştekîye daye. Eşkerayî de nê ameyî vatene:

XOANTIŞ KOMPLO Û KAYÊK O

“Wina fam beno ke hêrişê hemverê Rojavayê Kurdistanî û Vakurê Sûrîye yê dewleta Tirkî perçeyêkê komplo û kay ê. Na raştî xo binkewtişê polîtîkayanê sîyasî îqtîsadî û komelkîyan ê dewleta Tirkî yê hemverê Têgêrayîşê Azadîya Kurdan de raamojnena.

Wina aseno ke seba dewleta Tirkî ya ke kewta prosesê rijîyayîşî operasyonêkê xelisnayîşî ameyo destpêkerdene û hemverê Şorişê Rojava de komployêk ameya viraştene. Seba hetê sîyasîyî ra paştîdayîşî zî derheqê 3 serkêşanê Têgêrayîşê Azadîye qerarê tepiştişî ameyo girewtene. Nê heme seba xelisnayîşê îqtîdarê AKP-MHPyî yê. La ê se bikerê zî dewleta Tirkî nêşkena mîyanê çala Sûrîye ra vejê.”   

BI HÊRIŞÊ ÎŞXALÎ Û XOANTIŞ DO ŞORIŞ HÎNA BIBO BIHÊZ

“TEV-DEMî Sûrîye ra xoantişê Amerîka sey vengdayîşêkê îşxalkerdişê dewleta Tirkî ercnabi. La înan çend planê winayênî viraştî zî nêeşkayî xeta şorişî ya demokratîke ya Vakurê Sûrîye rayîrê ci ra dûrî bifînê. Eksê ci de Kurdî, Erebî, Asûrî-Suryanî, Çerkezî, Tirkmenî, Durzîyî û Ermenîyî xeta neteweya demokratîke de yewîya xo kenê xurt û şorişî her roje hîna aver benê.

Mudaxeleyê hêzanê teberî bîyêne sebebê tayê probleman ke hêz û dînamîkê demokratîkî mucadele de zehmetîyan antêne. Na yewe ra xoantişê hêzanê Amerîka do bibo sebeb ke heme hêzêe demokratîkî mucadeleyê xo hîna aver berê.”

HEMSENCÎYÊ NEWEYÎ DO ÎŞXALANÊ NEWEYAN BIN BIFÎNO

“Heme hêzê teberî yê ke mudaxeleyê Sûrîye kerd eslê xo de bîyî sebeb ke mucadeleyê demokrasî yê hêzanê Sûrîye rayîrê xo ra dûrî bifîno. Xusûsen zî dimayê mudaxeleyê dewleta Tirkî ra ver bi rayîrê xeletî ancîya. Wa no bêro zanayene ke xoantişê Amerîka do mucadeleyê hêzanê demokrasî nêkero zihîf. Eksê nê de do hîna bibo xurt.

FIKRÊ TESFÎYEKERDIŞÎ YÊ TIRKÎYA DO XEYAL RA WET NÊŞIRO

“Her çend Tirkîya polîtîkayanê xapênayoxan hemverê Îranî de bica biyaro zî Îran zano ke Tirkîya hemverê ci de Amerîka dir planan kena. Eke Tirkîya fikrêna ke do bi paştîdayîşê Amerîka xo serê Erebanê Vakurê Sûrîye de bikero bitesîr û bi hemkarîya tayê Kurdan Şorişê Rojavayî bin bifîno no do xeyalêk ra wet nêşiro.

Eke PDK bêro kayê dewleta Tirkî û hemverê Şorişê Rojava de dişmenî bikero oyo ke vîndî bikero do o bo. Ganî PDK seba virazîyayîşê yewîya Kurdan rolê xo bica biyaro û gureyê xo bikero.”

HEMVERÊ HÊRIŞAN DE MA DO HEME TEWIR PAŞTÎDAYÎŞÎ BIDÊ

“Nika qezenco tewr gird ê şorişê Sûrîye yê demokratîkî viraştişê yewîya xeta neteweya demokratîke ya şarê Kurd, Ereb, Suryan û şaranê bînan o. Ganî na yewîya ke Vakurê Sûrîye de virazîyaya hemeyê Sûrîye û Rojakewtena mîyanêne de vila bibo.

Sere de Kurdan ma veng danê heme şaranê Vakurê Sûrîye ke hêzê xo yê cewherîyî esas bigîrê û mucadeleyê xo xurt bikerê. Ma reyna anê vîr ke ma serê nameyê şarê xo yê çar perçeyanê Kurdistanî de ma her tim kîşta înan de yê.”