Hemserekîya Konseya Rayberdişî ya KCKyî derheqê qirkerdişê Parîsî de eşkerayîyêka nûştekîye daye û nê vatî: “Ewro zîndan de, teber de û her cayo ke Kurdî tede estê bi serkêşîya mucadeleyê azadîya cinîyan seba şiktişê tecrîdê serê Rayber Apoyî mucadeleyêk yeno dayene. Tîya ra 6 serrî verî bi fermanê AKPyî Sakîne Cansize, Fîdan Dogane û Leyla Şaylemeze Parîs de ameyî qetilkerdene. Do hesreta embazanê ma ya azadîye bêro bicaardene, heme dişmenê Kurdan bêrê binfînayene.” Eşkerayî wina dewam kerde: 

 ‘HUKMATÊ AKPYÎ GAMA KE RIJYAYÎŞÎ DIR AME TÊRÎ PROSESÊ ÇARESERÎ DA DESTPÊKERDENE’

“Qirkerdişê Parîsî bi fermanê serekwezîrê ê dewrî Tayyîp Erdoganî hetê Hakan Fîdanî ra ame plankerdene. Bi endamê MÎTî Omer Guneyî da kerdene. La gama ke rixmê heme hêrişanê tasfîyekerdişê PKKyî de hukmatê AKPyî kerd vîndî û rijîyayîşî dir ame têrî prosesê pênêkewtişî da destpêkerdene. La AKP bi tecrîdê 5ê Nîsanî yê hemverê Rayber Apoyî reyna hêrişê qedînayîşê Têgêrayîşê Azadîya Kurdan da destpêkerdene.

Amerîka bi vetişê qerarê xo yê derheqê kadroyanê serkêşan de hêrişê dewleta Tirkî teşwîq kerdî. Rixmê hêrişan de ruho ke Sakîne Cansize zîndanê Amedî de ramotibi ewro ca de xo ramojneno. Nê xoverdayîşî do bi îradeyê berzî yê Sakîne Cansizan bireso serfirazî.

Têgêrayîşê Azadîya Cinîyan bi kede û serkêşîya Sakîne Cansizan ewro Têgêrayîşê Azadîya Kurdan hîna kerdo xurt û do Têgêrayîşê Azadîya Kurdan serra 7. ya şehadetê Sarayan de mucadeleyî hîna aver bero û peynîya îqtîdarê AKPyî yo ke qirkerdişê 9ê Çile dayo kerdene biyaro  Cayo ke mucadeleyê azadîya cinîyan serkêşîye keno serdestî, îqtîdar û kolonyalîzm nêeşkeno payra bimano. Têgêrayîşê Azadîya Kurdan zî ewro bi ruhê azadîya cinî şertê çi benê wa bibê cuya azade û demokrate ano nizd. Pêgirewtişê azadîye yê Sarayan (Sakîne Cansize), Rojbînan (Fîdan Dogane) û Ronahîyan (Leyla Şaylemeze) û mîraso ke înan ma rê verdayo ma rê ferman keno ke ma serra 2019 de mucadeleyî hîna bikerê xurt.

Ewro no mucadeleyo ke cinî serkêşîya ci kena mijdane dano ke do serra 2019î bi mucadeleyêkê pîlî bivîyaro. Nê bingeyî de ma sere de cinîyî yê Kurdan û ciwanan veng danê heme şarê Kurdistanî û dostanê înan ke mucadeleyî bikerê xurt, faşîzmê AKP-MHPyî birijnê û Kurdistanê Azadî û Tirkîyaya Demokratîke virazê.”