KCK: Ethem Xemgînî hemverê kolonyalîzmî de cehd kerdo

Hemserekîya Konseya Rayberdişî ya KCKyî bi munasebetê wefatê cigêrayox-nûştox Ethem Xemgînî mesajê serweşîye weşana.

KCKyî mesajê xo de vat ganî şarê ma bi hawayêk ke layiqê Ethem Xemgînî yo ê ver bi raywanîya êya peyêne oxir bikero.  

Dewamê mesajê KCKyî wina yo:

“Ma bi xemdarî pêhesîyayî ke tarîxnas û nûştoxo ercaye Ethem Xemgînî cuya xo kerda vindî. Ma keyeyê ci, embazanê ci, dostanê ci û heme şarê Kurdistanî rê serweşî wazenê. Xemgînî bi xebatanê xo yê derheqê tarîxê kurdan û yê derheqê Elewîtîye û Êzidîtîye de havilê pîlî seva mucadeleyê azadîya şarê Kurdistanî kerdê.”

“Kolonyalîstî tim tarîxî serûbin kenê, raştîyan nimnenê. Ethem Xemgînî hemverê nê zûranê kolonyalîstan de mucadele kerdo û seva ke raştî vejîyê meydan xebatî kerdê. Ê xo ra dima seva kesanê tarîxnas û cigêrayoxan materyalê muhîmî verdayê. Na yewe ra tarîxnasê ma û şarê ma do cehd û keda ê xo vîr ra nêkerê. 

Tarîxnas û nûştox Ethem Xemgînî têkilîya dostî Têgêrayîşê Azadî yê Kurdan dir viraşta û na dostîya xo heta helmê xo yê peyênî daya dewamkerdene. Na yewe ra ma wazenê ke hemeyê şarê kurdî, dostê înan Ethem Xemgînî bi hawayêk ke layîqê ci yo ver bi raywanîya êya peyêne oxir bikerê.”