Komîteya Perwerdeyî ya KCKyî bi wesîleya destpêkerdişê demê neweyî yê perwerdeyî, eşkerayîyêka nuştekî da û waşt ke wa sîstemê perwerdeyî yê tirkî bêro protesto kerdene.

‘HEQÊ ZIWANÊ DADÎYE SEY ŞITÊ DADÎYE HELAL O’

KCKyî dîyar kerd ke heqê perwerdeyê yê ziwanê dadîye sey şitê dadîye helal o û wina domna: "Semedê naye ganî pêroyê qij, genc, malim û welatperwerê şarê ma her ca de heqê perwerdeyê ziwanê dadîye biwazî. Ganî her keye, kuçe, bexçe û binê her kerraye sey perwerdexane û akademî bigirîyo dest."

‘PKK VERNÎYA QIRKERDIŞÊ KULTURÎ GURET’

Eşkerayî wina dewam kerd: "PKKyî ra ver ziwan û kulturê kurdî ameybî dûştê qedîyayîşî. Bi vejîyayîşê PKKyî vernîya qirkerdişê kulturî û sîyasetê îmha û înkarî ame guretene. Vernî de Rayber Apo û bi des hezaran şehîdan bi emeg û gonîya xo kurdan açarnayî cewherê înan ser. No zî Kurdîstan de bi sebebê xobîyayîş û averşîyayîşî."

‘GANÎ PERWERDEYÊ ZIWANÊ DADÎYE BÊRO WAŞTENE’

Komîteya Perwerdeyî ya KCKyî veng da şarî û wina va: "Sîstemê perwerdeyî yê dewleta tirkî înkar û îmhaye esas gêno. Dewleta tirkî şarê kurdî ya pîya şaranê bînan rê zî zextan kena û wazena ke bikera tek reng. Ganî şarê ma û hetê demokratî vera naye de bi protestoyan nê zîhnîyetî faşîstî rê vajê nê. Ganî demê perwerdeyê neweyî de xebatê neteweya demokratîke û perwerdeyê ziwanê dadîye bêrî xurt kerdene. Na çerçewe de wa her ca sey mektebêk bigirîyo dest.”