Hemserekîya Konseya Rayberdişî ya KCKyî bi wesîleya serrgêra 1ê Teşrîna peyêne Roja Kobanê ya Dinya eşkerayîya nuştekîye daye.

Eşkerayî ra tayî cayî wina yî:

4 serrî cuwa ver çar hetanê dinya ra demokrat, sosyalîst, roşnîkar, nuştox  û hunermendan 1ê Teşrîna peyêne sey Roja Kobanê ya Dinya îlan kerd. Na roje de şaranê cîya - cîyayan ra bi mîlyonan merdimî vejîyayî meydanan û paştî daye xoverdayoxanê Kobanê ke hemverê DAÎŞî de bi fedaîtîye şerr kerdêne. Paştdayîşê 1ê Teşrîna peyên a 2014î  biyo destpêkerdişê qedîyayîşê DAÎŞî û planê fetisnayîşê Şorîşê Rojawanî yê AKPyî zî pûç ameyî vetene.

SERKEWTIŞÊ KOBANÊ SERKEWTIŞÊ  ŞARANÊ DINYA YO

Serkewtişê Kobanê ke bi paştdayîşê 1ê Teşrîna peyêne sey Roja Kobanê ya Dinya ame destkewtiş tena serkewtişê Kobanê û şarê kurdî nîyo, heman wextî de no serkewtişê şaranê dinya yo. Kobanê bajarêko hempar ê dinya yo. Hêrişê vera Kobanê heme şaranê dinya rê benî.

ALMANYA, FRANSA Û RÛSYA ZÎ HEMPARÊ NÊ HÊRIŞÎ YÊ

Îqtîdarê AKP-MHPyî bi polîtîkaya dişmenatîye vera Kobanê û Şorişê Rojawanî hêrişanê xo zêdneno û Vakurê Sûrîye de îstîqrarê aştî tehdît keno. Nê hêrişê ke kombîyayîşê paştdayîşê faşîzmê AKP-MHPyî ra dima ameyî destpêkerdene,  Almanya, Fransa û Rûsya zî hemparê nê sucî kerdî. Ê ke vera DAÎŞî yê paştdayîşê Kobanê deynê milê înan o.

DI AMACÊ HÊRIŞAN ESTÎ

Faşîzmê AKPyî bi nê hêrişan hetêk ra dişmenîya xo ya şaranê Surîye ramojneno hetêk ra zî bi şovenîzmî hadreyîya weçînitişê  31ê Adar a 2019î keno. Hedefê înan de qezenckerdişê weçînitişê cayîyî esto. Bi na game  ê eşkenî dîktatorîya xo temamî de bidî cakerdene. Ganî şarê kurd, tirk û heme şarê dinya nê kayanê AKP-MHPyî bixeripnî.

HÊZANÊ DEMOKRATÎKE RÊ VENGDAYÎŞ

Şarê Tirkîya û hêzê demokratîkî ganî weçînitişî ya verî heme kayanê înan deşîfre bikerî. Nê hêrişan de karê şaranê Tirkîye çîn o. Tena hêrsê şarê herême yê vera Tirkîya zafêr beno. Coka ra ganî heme hetê sîyasî, demokrat û muxalîfî yê Tirkîya hemverê nê hêrişan de vinderî û destûr faşîzmê AKP-MHPyî rê medî.