KCKyî qerarê MHME û hukmatê Almanya rexne kerd

Hemserekîya Konseyê Caardişî yê KCKyî qerarê Mehkemeya Heqê Merdiman ya Ewropa (MHME) sey paştîdayîşê tecrîdî hesibna û va ‘Ewropa eşkera mojna ra ke ê polîtîkaya zextî yê Îmrali normal vînenî'.

Hemserekîya Konseyê Caardişî yê KCKyî bi eşkerayîyêka nuştekî qerarê çin hesibnayîşê îşkenceyê Îmrali yê Mehkemeya Heqê Merdiman ya Ewropa (MHME) û dawetê Erdoganî yê Alamya rexne kerd.

Eşkerayîya KCKyî de gencê kurdî Umît Acaro ke seba protestokerdişê tecrîdî Almanya de xo veşnabi, seba merdimanê ci û şarê Kudîstanî serweşîye ame waştene.

Eşkerayîye de seba çalakîya Acarî wina ame vatene: "Ma zanî ke Rayber Apo nêwazeno seba ey çalakîyê winasî bêrî viraştene. La na çalakîye vera tecrîdê Îmrali û qerarê MHME vindertişêko erjaye yo. Bitaybetî zî wextê zîyaretkerdişê Almanya yê Erdoganî de viraştişê çalakîye peroyê dinya rê mesajêko têsîrin bi. Na çalakîye zî bîye leteyêkê têkoşînê ‘ŞIMA NÊŞKENÎ TÎJA MA TARÎ BIKERÎ'.

KCKyî dewamê eşkerayîya xo de qerarê MHME rê hêrsê xo ard ziwan û va: "Dekewtişê serrgera 21. ya Komploya Mîyanneteweyî de qerarê redkerdişê zextê Îmrali, hîna eşkera ramojneno ke Ewropa û hêzê ke engîştê ci Komploya Mîyanneteweyî de estî, rolê înan sîstemê Îmrali de gird o. Ewropa bi nê qerarî eşkera îfade kerd ke ê polîtîkaya zextî yê Îmrali meşrû vînenî. No zî rejîmê tecrîd û zextî rê şîrikbîyayîş o."

Eşkerayîya KCKyî wina dewam kerde: "Xo veşnayîşê gencê kurdî esas de Ewropa û protestokerdişê komplokaran o. Vera tecrîd û zextê Îmralî de protestokerdişê bêvengîye yo. Zîyaretê Erdoganî zaf bêqiymet o. Almanya goreyê karê xo têgerêna û Erdoganî şuxulnena. Almanya waştişê şarê xo nêgoşdarena. Seba înan fîkrê şarî muhîm nîyo. Demokrasî zî tena qale de esta û bi vatişê demokrasî karê xo yê lêminan nimnenî. Zîyaretê Ergodanî û qerarê MHMEye maskeyê Almanya daye ware. Almanya de xo veşnayîşê gencêk, veşnayîşê pêkerdişê sey cemedî û rejîmê bêvîjdanîyî yo. Ê ke qerarê MHME girewt û Erdogan xalîya sûre de peşwazî kerd, vera vîcdanê merdimîye, heq û edelatî de do bêrî veşnayene."