Mesajê KCKyî yê Qirkerdişê Mereşî: Ganî hêzê demokrasî îtîfaq virazê

Hemserekîya Konseya Rayberdişî ya KCKyî bi wesîleya serragêra qirkerdişê Mereşî mesajêk weşana û seba vernîgirewtişê qirkerdişanê neweyan veng da ke hêzê demokrasî îtîfaqê xo virazê.

KCKyî eşkerayîya xo ya nûştekîye de vat: “Ma serra 40. ya qirkerdişê Mereşî de kesê ke cuya xo vîndî kerdê bi hurmet vîr anê, sozê xo yê bicaardişê hesreta înan a Tirkîyaya demokratîke, Kurdistano azad tekrar kenê.”

Eşkerayîye de ca dîyayî nînan: “Serra 1978 de kontrgerîlayanê MHPyîyan ke ewro AKPyî dir îtîfaq de yê bê ke vajê cinî, doman, kal û ciwan bi seyan Kurdê Elewîyî kiştî. Dimayê nê qirkerdişan ra bajaranê Kurdanê Elewîyan ê sey Mereş, Meletî û Sêwas ra koçêko pîl virazîyayo. Kurdê Elewîyî yê ke verê qirkerdişî zafaneyê ê bajaran ardêne pê dimayê qirkerdişî ra kewtî halêkê kemhûmare.”       

QIRKERDIŞÊ MEREŞÎ QIRKERDIŞÊKO GIRAN O

“Verê qirkerdişî Kurdê Elewîyî tenya qeza yan zî dewanê Mereşî de nê zereyê Mereşî de zî wayîrê nufûsêka zafe bî. Seba ke aktîvîya tîcarî ya Elewîyanê Mereşî bêro şikitene bi paştîdayîşê dewlete înan hêrişê mehleyanê Kurdan kerd. Kargehê Kurdan ameyî rijnayene. Çîyê ke wextê qirkerdişî de û dimayê ci virazîyayî qirkerdişêko giran bi. Nê qirkerdişî wextêk de virazîyayî ke mucadeleyo demokratîk Tirkîya û Kurdistan de aver şibi.”   

ELEWÎYÎ ERDANÊ XO RA AMEYÎ KOÇKERDENE

“Qirkerdişê Mereşî ra dima rojawanê Firatî de û herêma Kurdanê Elewîyan de halo demografîk vurîya. Bajaranê sey Mereş, Meletî, Sêwas, Semsûr, Erzingan û Dêrsim ra ver bi metropolanê Tirkîya û Ewropa koç kerd.

Hêrişan dimayê qirkerdişî zî dewam kerd. Serra 1993 de vêşnayîşê Otela Madimake îşaretê dewamkerdişê nê hêrişan o. Ganî Elewîyî cayê ke tede yê ancî zafaneyê nufûse virazê, eke wina nêbo do nêeşkê estbîyîşê xo bidomnê. Ganî şarê ma yê Elewîyî hem bajaranê xo de, hem zî Ewropa û metropolan de bêrê têhet û xo organîze bikerê.”   

GANÎ HEMVERÊ QIRKERDIŞAN DE HÊZÊ DEMOKRASÎ BIBÊ YEW

“Hemverê qirkerdişan de hêzê demokrasî bi hawayêkê aktîfî mucadele bidê. Çunke heta Tirkîya mebo demokratîke bawerîyî do azad nêbê. Hemverê qirkerdişan de tewiro tewr rind mîyanê mucadeleyê demokrasî de bi hawayêkê aktîfî cagirewtiş o. Seba nê zî ganî heme hêzê demokrasî mîyanê têkilî de bê û îtîfaqê xo virazê.

Nika Tirkîya de sîstemo faşîst ê AKP-MHPyî esto. Ma sey Têgêrayîşê Azadîya Kurdan soz danê ke seke vizêr ewro zî seba azadîya bawerî ya Elewîyan ma do mucadele bidê. Serragêra qirkerdişê Mereşî de heme şehîdanê xo yê ke hetê hêzanê qirkerdoxan ra ameyê kiştene bi hurmet vîr anê.”