Dedeyê Cemxaneyê Merkezê Dêrsimî Seyît Mehmet Halîsî qeyûmê Şaredarîya Dêrsimî Tuncay Sonel şibênabi Xizirî. Hemverê naye de reaksîyonî zêdîyenê.

Pîr Zeynel Keteyî vist vîrî ke bawerîya Elewîyan de bê rizayê cimatî tewr çîyêk nêno kerdene û vat: “Bê riza, kes nêeşkeno bikewo keyeyê talibê pîrî zî. Ganî vernîye rizaya ê keyeyî bibo. Qeyûm, bi rizayê ma nîyo. Kesê ke bi rizayê ma bîyê şaredar nika girewte yê. Şaredarê girewteyî, bi razayê Elewîyan bîyî û winî dest bi karî kerd. Ma îqrar da înan.

'HENEKANÊ XO BI AQILÊ XIZIRÎ KENÊ'

Keteyî vat ke azdîya heqîqetî binê zor û zehmetî de ya  û wina dewam kerd: “Xizir azadî yo, heq o. Eke heq çin bo,  Xizir zî çin o. Eke Xizir bibo,  heq zî esto. Mamosteyêk rawurzo qeyûm bişibêno Xizirî. No yeno manaya ke henekê xo bi aqilê Xizirî keno. Bawerîya ma de cayê vatişanê nê mamosteyî çin o. Heta meydan nêro awan kerdene, heta bi rizaya şarî nêbo, kesêkê tayînkerdişî şibênayîşê Xizirî caverde, tewr tercîhê ma nîyo. Kesê ke hemberê nê zulmî de veng nêkenê senî benê Xizir. Cemê ma de Xizir sey Hz. Elî mumînê ma yo. Nameyê ey zî Xizir o.’’

'XIZIR SEBA MA PÎROZ O'

Hemsereka Komela Elewîyan a Demokratîke (DAD) Ana Selda Guneşe zî ard ziwan ke Xizir goreyê kesan nêvurîyeno û seba Elewîyan pîroz o. Guneşe vat, “ Xizir heqîqet o. Eke mamosteyêk  qeyûmî bişibêno Xizirî, o mamoste  êdî rayîr ra kewt o. Kesê ke rayîrê heqîqetî de yê û nê rayîrî de nê vatişan bikerê ma ra nîyê. Kesê ke kesanê heqîye xesp kenê û înan şibênenê Xizirî, bêedebî yê.

Guneşe vat: “Xizir ê mamosteyî rê seba ê vatişan ardim bikero. Rayîro rast nîşanê ey bido. Homa ey islah bikero. Bi nê vatişan verê çimanê Elewîyan ra û her çîyî ra ver, çimê heqîye ra kewto.”