Licê de qedexe û operasyon dewam kenî

73 mehla û mezrayê ke pabesteyê Licê yê înan de qedexeyê tebervejîyayîşî roja hîrine û operasyono leşkerî zî roja çarine de dewam kenî. Xeylî nuqteyanê leşkerî yê herême de nasname û wesayîtê hemwelatijan yenê kontrolkerdene.

7ê Teşrîna peyêne de hetê walîtîya Amedî ra 19 mehla û 54 mezrayê ke bejikê qezaya Licê de yê, saet 06.00 ra tepîya qedexeyê tebervejîyayîşî ke  amebi îlankerdene roja hîrinede, û bi tewrbîyayîşê yewîyanê nimiteyan operasyono leşkerî zî roja çarine de dewem kenî.

Ame vatene ke herême de têgêrayîşê teyareyan û cayê operasyonî de fealîyetê yewîyanê nimiteyan estî. Mehlayanê Qirêkê Cûmî, Til, Zirext, Melê, Bawerd, Comelaş, Xana Kelê û Hêdîkî de leşkeran nuqteyê kontrolî ronayê. Nê cayan de wesayîtî yene kontrolkerdene û nasnameyê hemwelatijan GBTyî (zanayîşo pêroyî) ra yenê ravêrtene.