Herêma Bradostî tarîx ra nata vera hêrişan de payan ser o vindeta. Cinîyê Bradostî zî nê xoverdayîşî de wayîrê parêka girde yî. Cinîyan vera dagîrkerîya dewleta tirkî de reaksîyon nîşan da û dîyar kerd ke ê bi girêdayeyîya erdî zorê nê zulmî berdî. Cinîyê ke zozanan de cuyenî ra cinîya bi nameyê Meryeme va ‘40 serrî ra zêde yo ke ma yenî zozanan’ û wina domnaye: “Labelê verê hîna weş bi. Nika dagîrkerî rehetî nêdanî ma û vernîya cuyayîşê ma de benî asteng. Dormeyê ma bombe kenî. Ma nêşênî heywananê xo bidî çerênayene. Na rewşe hem ma rê û hem zî heywananê ma rê problem a.”

Meryeme dewamê qiseykerdişê xo de va ‘dewletê Îran û Tirkîya hertim ma ser o bombeyan varnenî’ û wina dewam kerd: “Ma yewîya kurdan wazenî. Ancax bi no hawa dagîrkerîye yena vindarnayene û huzir yeno herême. Çend rojî verê Lêlîkan de domanêko 5 serre hetê dewleta tirkî ra ame qetil kerdene. Labelê ti kes nînan nêvîneno. Bi hezaran merdimê ma ameyî qetil kerdene. Ma wazenî tîya de bicuyî û tîya de bimirî. Cok ra ma do erdanê xo nêdî ti dewlete. 4 lajî û 3 keynayê mi estî, eke lazim bibo, ez do hemînan feda bikera.”

GONÎYAYA MA RIJÎYAYA NÊ ERDAN, MA NÊDANÎ

Cinîya bi nameyê Suara ke dewa Lêlîkanî de cuyena, wina va: “Eke vernîya qetlîyamî biameyêne girewtene, o wext ewro na dagîrkerîye nêbîyêne.”

Suara ke 2 birayî û merdimê xo qetlîyam de vînî kerdî, va ‘teberê nînan de xeylê şehîdê ma zî estî’ û wina domnaye: “Zulmê dewleta tirkî dewam keno. Seba ke wayîrê Bradostî nêvejîyenî, tirkî dagîr kenî. Teyarayî danî sivîlan ro. Ma heta serê sibayî vengê teyarayan ver nêşênî rakewî. Şar mexdur o. Gonîyaya ma rijîyaya nê erdan û wa dagîrkerî bizanî ke ma nê erdan nêdanî ti kesî.”