'Ma Qirkerdişê Mereşî xo vîra nêkerd, do medê vîrakerdene'

Dêrsim de bi wesîleya serrgêra 40. ya Qirkerdişê Mereşî vîrardişêk ame viraştene û ame vatene ke ma Qirkerdişê Mereşî xo vîra nêkerd, do medê vîrakerdene.

Dêrsim de Merkezê  Peroyî yê Komela Elewîyan a Demokratîke (DAD) û  Komela Kulturî ya Pîr Sultan Abdalî bi wesîleya serrgêra 40. ya Qirkerdişê Mereşî vîrardişêk viraşt. HDP, ÎHD, temsîlkarê sendîqayan û rêxistinanê sivîlan zî tewrê ci bîyî.

Vîrardiş de  Ocagê Baba Mansurî ra Pîr Nesîmî Genlîkî ard ziwan ke Elewîyî wextê estbîyayîşê xo ra yenî qirkerdene.

Anayanê  Ocagê Dervîş Cemalî ra Menşure Dogane zî vat ke dewaya ma ya gonî nê ya merdimîye ya û best pa: ‘‘Ewro qirkerdiş formê xo bibedilno zî dewam keno. Ziwan û îtîqatê ma çîn benî. Qirkerdişî hinî rojanê benî. Ma bîyê sey ciwîyayenanê  merdeyan. Lazimo ke ma ganî bê.‘‘

Reyna qiseykerdoxanê bînan zî vist vîrî ke qirkerdişî organîzekerde yenî viraştene û heme Elewîyî yenî hedef girewtene. Ame vatene ke cayê bimbarekî bi bombardûmanan serûbin bîyî , nê cayan de kaleqolî yenî viraştene û bîyê cayê qedexeyî. No zî ramojneno ke ewro hema polîtîkaya înkar û asîmîlasyonî ya vera Elewîyan yena domnayene. Vîrardiş bi vatişê ma Qirkerdişê Mereşî xo vîra nêkerd, do medê vîrakerdene qedîya.