'Ma şarê Colemêrgî paştî danê Leyla Guvene'

Hemserekê HDPyî yê bajarê Colemêrgî Sînan Kayayî vat: "Ma şarê Colemêrgî heta peynî kîşta parlamentera xo de yê."

Leyla Guvene rê kîşta paştîdayîşê şarî de yê sîyasetkaran zî dewam keno. Hemserekê HDPyî yê bajarê Colemêrgî Sînan Kayayî vat ke Guvene seba baleantişê tecrîdê serê Ocalanî na çalakîye viraşta. Kayayî vat: "Çalakîya grevê vêşanîye ya parlamentera ma Leyla Guvene çalakîyêka bica ya, ercaye ya. Ma şarê Colemêrgî heta peynî paştî danê çalakîya parlamentera xo."  

'ŞEXSÊ BIRÊZ OCALANÎ DE ŞARÊ KURDÎ SER O TECRÎD YENO BICAARDENE'

Kayayî wina dewam kerd: "Gama ma ewnênê tecrîdê serê birêz Ocalanî ra ma vînenê ke eslê xo de no tecrîd hemverê hemeyê şarê Kurdî de yeno bicaardene. Mumkun nêyo ke ma sey şaro Kurd nê tecrîdî qebûl bikerê, ganî tecrîdê serê birêz Ocalanî tavilî bêro wedartene."

Kayayî peynîya qiseykerdişê xo de bale ante ke Leyla Guvene Colemêrg ra bi 100 hezar ra vêşêr reyan amîya vîjnayene û wina vat: "Çi heyf ke waştişê parlamentera ma yo demokratîk hetê AKPyî ra bi zanayîş nêno dîyene. Wazeno ke sîyasetkaranê Kurdan û şarê Kurdî bi tepiştişan bieceqno. Parlamentera ma seba şexsê xo çîyêk nêwazena. Bi temamî wazena ke bale bianco tecrîdê serê rayberîya ma. Îradeyê parlamentera ma yo, ma hurmet ramojnenê û heta peynî paştî danê ci."