Malatya de 181 cenazeyê ke nasnameyê înan zelal nêbî estî

Morg û goristananê Malatya de pero pîya 181 cenazeyî ke nasnameyê înan nêameyê eşkerakerdene estî.

Pêkewtişanê Kurdîstanî de yê  ke cuya xo vîndî kenî zafê înan yenî berdene bi Sazîya Tibê Edlî yê Malatya (ATK) û bê zelalkerdişê nasnameyê înan û xeberdayîşê merdimanê înan goristanê bêkesan de yenî definkerdene.

Goreyê zanayîşan morgê Malatya de 10 cenazeyî semedê teşhîskerdişî yenî pawitene. Goristanê Asrî yê Malatya de zî 71 cenazeyê bê teşhîskerdeyî estî. Reyna 100 cenazeyî zî goristanê bêkesan de yê.

 Ame vatene ke nê cenazeyî pêkewtişanê Dêrsim, Çewlîg, Malatya, Sêwas, Xarpêt, Mûş, Semsûr û Mereş ra ameyî berdene bi Malatya.

Bi sebebo ke meyîtî bombardûman de bîyê lete leteyî merdimê înan teşhîskerdişî de zehmetîye ancenî.

Reyna keyeyê ke cenazeyanê xo teşhîs kenî zî şaredarîyê bajar û qezayan wesayîtê cenazeyî nêdanê înan.