Malazgîrt: Gerîla 2018 qezenc kerd, do 2019î zî qezenc bikero

Fermandaranê Qerargehê Merkezî yê Pawitişê Şarî ra Amed Malazgîrtî vat gerîlayan serra 2018 de bi çalakîyanê xo rayîr nêdayo îşxalkarî û serra 2019 zî do bibo serrêka pîle ya şerî û heto ke qezenc bikero do gerîla bibo.

Fermandaranê Qerargehê Merkezî yê Pawitişê Şarî ra Amed Malazgîrtî vat, “Bawerîya ma tam a ke do xoverdayîşê zîndanan zî bi ser bikewê. No xoverdayîş hemverê dewleta Tirkî de nîşanê îradeyêkê pîlî yo. Na yewe ra medyaya hawuze û dormeyê ke nizdê hukmatî yê hemverê nê çalakîyan de bêveng ê û qe nêgênê rojdem.”

Malazgîrtî Stêrk TV ra persanê Şervan Araratî rê cewab dayî û nê vatî:

“Sûrîye de cayo tek o ke cuya azade esta Rojava yo. Hedefê dewleta Tirkî no yo Kurdan rê cayê cuye nêverdo. Seba ke îradeyê şarê Kurdî qebûl nêkenê hêriş kenê. Înan Efrîn de no kerd, nika wazenê ke hemeyê Rojava de wina bikerê. Erdogan Kurdê bêîradeyî wazeno. Nika Vakurê Kurdistanî de binê nameyê qorucîtî de awanîyêka çete virazenê nînan Kurd hesibnenê, rol danê nînan û wazenê înan bidê vernî.

Şaranê Kurdistanî seba azadîya xo û erdanê xo bi hezaran şehîdî dayê. Kurdî bi rehetî nêresayî dereceya ewro. Bedelê pîlî dayî, bi des hezaran qehremanê ci şehîd kewtî. Şaranê bînan ê Sûrîye zî kîşta Kurdan de ca girewt û şehîdî dayî. Seba ke azadîya xo binê serbanê Kurdan de vînenê QSD û YPG de ca gênê.

Erdogan vano ‘Ma do Sûrîye bidê wayîranê înan ê eslîyan.’ Qaşo şarê Erebî îma keno la Erdogan Ereban zî sey dişmen vîneno. Hêzê sey Artêşa Azade ya Sûrîye El-Nûsra û DAÎŞî ra ameyê pê. Hukmatê AKPyî nê hêzan paweno, perwerde keno û îmkananê eskerî û ekonomîkî dano. Wazeno ke serê nê hêzan ra Sûrîye de xo bica bikero. Wazeno ke Bab ra heta Heleb, Rojavayê Kurdistanî ra heta sînorê Iraqî Mosil û Kerkukî îşxal bikero û hewnê xo yê Osmanîyan bica biyaro.  

 ‘SEBA HÊRIŞAN GIRANÎ DA DÎPLOMASÎ’

Seba ke dinya çimê xo hêrişanê înan rê bigîro mîyanê fealîyetê dîplomasî yê giranî de yê. Bi nê şeklî wazenê zemînê hêrişan ronê. Tirkîya wazena Sûrîye îşxal bikero. Bala xo bidê çi wexto ke DAÎŞ ver bi vîndîbîyayîş şino hukmatê AKPyî xusûsen zî Erdogan Kurdanê Rojava terorîze keno û DAÎŞî tengasîye ra xelisneno. Dewleta Tirkî senî Başûr de bargehê xo viraştê wazena ke Rojava de zî virazo. Bi talîmatê Erdoganî domanê 7 serrî qetil kenê vanê PKKyî, maya 70 serrî qetil kenê vanê PKKyî û dinya zî çimê xo gêna.

Eke dinya vernîya ci nêgêro Erdogan hemeyê dinya rê tehdîtêk o. Teroro esas bi destê hukmatê AKPyî yeno bicaardene. Parlementer, serekê şaredarîyan, aktîvîstî û çi keso ke sey ê nêfikrêno yan kişeno yan zî erzeno zîndanan. Na dîktatorîye ra zî wet a, barbarî ya.

 ‘PKKYÎ BI MUCADELEYÊ XO YÊ 2018Î ÎRADEYÊ ARTÊŞA TCYÎ ŞIKITO’

2018 serrêka çetin bî. Hetê ci yo sîyasî estbi la zafane bi şer vîyarte. Hukmatê AKPyî nê hîrê serranê peyênan de tim vat PKK qedîno. Înan no vat la PKKyî hetê sîyasî û eskerî ra xo hîna aver berd. Dewleta Tirkî tewr zaf giranîya xo 2018 de daye, bi hawayêkê qismî operasyonê bejikî viraştî la zafane xo dayî serê teknîkî. PKKyî îradeyê artêşa Tirkî şikit. Seba ke nêeşkayî bejik ra netîce bigîrê bi teyareyanê şerîe hewa ra hêriş kerd.

Rixmê hende teknîk û hêrişanê hewayî de zî hêzanê gerîla xeylî çalakîyê bitesîrî viraştî. Dewlete çalakîyî rayapêroyîye ra nimitî. La vejîya werte ke planê hukmatê AKPyî yê 2018 de tasfîyekerdişê PKKyî veng vejîya. Hêzanê PKKyî bi çalakîyanê xo hem xo pawit û hem zî da hêzanê îşxalkaran ê Tirkî ro. Ma sey hêzê gerîla serra 2018î serrêka serkewtî vînenê. Helbet vîndîbîyayeyê ma bî. Xeylî embazê ma yê qehremanî şehîd kewtî. Netîce de no şerêk o. TC se keno wa bikero do nêeşko vernîya gerîla bigîro.

Gerîlayî 2018 de wezîfeyê xo bica ard û bi wayîrê xeylî tecrubeyan. Vernîya ma de şerêko hîna çetin esto. Qaso ke aseno zihnîyetê kolonyalîstî yê TCyî de nîşanê biratî û dostî çinyê. Na yewe ra ma zî xo şerêkê pîlî rê kenê hadre. Do rejimê AKPyî yo kolonyalîst bi ser nêkewo û do vîndî bikero. AKP do nêeşko nê şerî hîna zaf rayra bero, ekonomîya ci qîm nêkena.  

Ma bi yew gerîla heta bi se gerîlayan kamca çalakî bikerê, senî bikerê û kamca hêrişanê mewzîyanê dişmenî bikerê hemine zanê. 35 serrî yo ma hemverê hêzanê kolonyalîstan ê TCyî de şer kenê û netîceyanê rindan gênê. Nê wareyî de çalakîyê ke 9-10ê Teşrîna peyêne de ameybî viraştene hetê terzê xo ra yê ewilên ê.

Ma bi hêzo ke Rayberîya xo ra gênê hemverê îşxalî de mucadeleyî domnenê. Çalakîya grevê vêşanîye ya Leyla Guvene bi tewrbîyayîşê seyan kesan agêra xoverdayîşêkê pîlî. Eke xoverdayîş bingeyêkê rindî serî bêro rayraberdene do xo dir serfirazî bîyaro. Şarê ma bi kulturê xoverdayîşî yê PKKyî bî pîl. No xoverdayîş hemverê dewleta Tirkî de nîşanê îradeyêkê pîlî yo. Na yewe ra medyaya hawuze û dormeyê ke nizdê hukmatî yê hemverê nê çalakîyan de bêveng ê û qe nêgênê rojdem. La ma zanê ke do no xoverdayîş serfirazîyanê pîlan xo reyde bîyaro.

Dewleta Tirkî Rojava, Vakur û Başûrê Kurdistanî de hadreyîyanê pîlan ê şerî kena. 2019 de do Kurdistan de şerêko pîl virazîyo. No şer do bi Rojava yan zî Başûr bisînor nêbo. Serra 2018 de Xakurkê ra heta Şemzînan, Gever, Colemêrg bi seyan çalakîyê ma virazîyayî. Gerîla zaf bedelê pîlî zî dayî. La nêverda ke planê îşxalî yê Başûrî yê artêşa Tirkî şiro sere. Nika qereqolanê sînorî rê taqwîyeyê pîlî kenê û wazenê ke aver şirê. Naye ra 2019 de do Vakurê Kurdistanî de û do Başûrê Kurdistanî de şerê pîlî virazîyê. Bedelê ci çi beno wa bibo gerîla do musade nêkero ke aartêşa TCyî ya îşxalkare aver şiro.

Ma serra 2018 peyê xo de verdaye û kewtî 2019. Ma sere de serra newî ya Rayber Apoyî pîroz kenê û silam kenê. Ma serrî newî ya şarê xo, dostanê şarê xo û hemrayanê xo yê zîndanî zî pîroz kenê. Bi umîdo ke do serra 2019î şaranê Kurdistanî rê azadî biyaro ma heme dormeyanê mucadeleker-xoverdayoxan rê serkewtiş wazenê.