Kampa Şehîd Rustem Cûdî (Mexmûr) de seba tecrîdê serê Rayberê Şarê Kurdî Abdullah Ocalanî wedarîyo û seba azadîya ci grûbêka Kurdistanijan dest bi grevê vêşanîye kerd.

Endamê Komîteya Karê teberî yê Mexmûrî Bêwar Unverî yo ke derheqê çalakîye de eşkerayî daye vat: “27ê Temmuze 2011 ra nata destûr nêdîya rayber Apoyî ke avûkatanê xo dir pêvînayîş bikero. Seba şikitişê tecrîdê serê rayberê xo ma kewenê grevê vêşanîye.”

Unverî bombardûmankerdişê teyareyanê şerî yê dewleta Tirkî yê kampe zî şermezar kerd û nê vatî: “Ma do heta peynî erc û rûmetê xo bipawê. Heta tecrîd bişikîyo û faşîzm birijîyo ma do vengê xo berz bikerê.”

Eşkerayîye ra dima bi slogananê ‘Şehîdî nêmirenê’, ‘Biciwîyo Serek Apo’, ‘Biciwîyo xoverdayîşê zîndanan’ û ‘Biciwîyê heme çalakîyê hemverê tecrîdî’ grevê vêşanîye dest pêkerd.