Mîyanê Colemêrg-Wanî de kîşta nuqteyanê cigêrayîşî yê dekewtiş û vejîyayîşê Depîn, Kirikdag, Yenîkopru û Elbakî de cayanê sey Bebleşîn, Albayrak, Hoşap, Zernek, çatrayîrê Payîzava-Wanî û Kurubaş de zî xeylî nuqteyê cigêrayîşî estê. Hemwelatijî her nuqteya cigêrayîşî de bi saetan yenê vindartene.

Mîyanê Stenbol û Erzeromî 2 hezar kîlometre yo û tu nuqteyêka cigêrayîşî çinya la mîyanê Colemêrg û Wanî de 20 ra vêşêr nuqteyê cigêrayîşî estê. Ge-gane nê cigêrayîşan de mabênê hemwelatijan û hêzanê dewlete de tengizîyî virazênê, hemwelatijî raştê heqaretî yenê heta yenê destbendkerdene.  

HETA NÎMEYÊ ŞEWE DEWAM KENO

Nuqteyan de ge-ge bi kîlometreyan rêze virazêna. Rêzanê wesayîtan ê dergan de ambulansî zî yenê vindarnayene. Xusûsen nuqteya eskerîye ya Yenîkopru ke hîrêgoşeyê Wan-Colemêrg-Gewerî de ya û nuqteyanê Bableşîn û Hoşapî ke mîyanê Payîzava-Elbakî de yê hemwelatijî heta nîmeyê şewe zî yenê vindarnayene. 

RAYÎRÊ 3 SAETÊ HETA 12 SAETAN ZÎ BENO DERG

Xeylî wesayîtî rîyê rêzanê dergan ra mecbûr manenê ke agêrê Colemêrg yan zî Wan. Heta tayê wesayîtî seba ke nuqteyanê cigêrayîşan de nêrê vindarnayene rayîranê bitehlukeyan ê koyan cerebnenê. Rayîrê Colemêrg-Wanî ke 3 saetî yo vejêno heta 12 saetan. Hemwelatijêk ke mîyanê Colemêrg-Wanî de raywanîye keno ANFyî rê qisey kerd û nê vatî: “Ma rayîrê mîyanê Wan-Colemêrgî ra vanê ‘rayîrê îşkenceyî.’ Çunke nê rayîrî de her tewir zehmetî esta. Dewlete ser de zî roj bi roje hûmara nê nuqteyan hîna kena vêşî. Eşyayanê ma yew bi yew danê têro. Wina aseno ke dewlete ma ra zaf tersena. Eke nêtersayêne hende cigêrayîşî nêkerdêne.”