Karkero bi nameyê Îrfan Îşleyen Îdareyê Awe û Kanalîzasyonê Wanî (VASKÎ) ke girêdayeyê Şaredarîya Bajarê Girdî ya Wanî ke hetê qayûmî ra yeno îdare kerdene de xebetîyeno, seba pakkerdişê borîya awe, kewtbi mîyanê borîye, labelê kewt mîyanê awe û merd.

Hedîse depoyê awe ke Taxa Işikliya Corêne de yo û tede awa şimitişî esta de qewimîya. Karker Îşleyen seba ke borîyan de pakîye bikero, kewt mîyanê borîye labelê awe de şi. Cenazeya Îşleyenî kîlometreyêk û nîme durî de ameye dîyayene.

Mergê Îşleyenî raya pêroyî de sey qezayê karî ame dayene, labelê ama musayene ke eynî herême de qezayê bînî zî virazîyayî. Herçiqas ke xeylê qezayê bînî zî bîyî, VASKÎ ti tedbîran nêgêna. Hetta AKPyîyî wextê hedîseyî de 200 metre durê hedîseyî de derheqê herînayîşê pincarî de pîrozkerdişê xo domnayî.

Îxmalê ke bîyî sebebê mergê Îşleyenî:

*Ganî qepaxê ewleyîyin yê kanalîzasyonê ke Îşleyen kewto mîyan bibo, labelê tîya de çîyêko winasî çin o.

*Ganî karkero ke bikewo mîyan, kemerê ewleyîye girê bido, labelê no zî nêameyo kerdene.

*Xebatanê winasî de kendîlê ke karkerî ra girêdaye yo, ganî asino ke mîyanê betonî de ameyo ca kerdene ra girêdîyaye bo, labelê no hedîse de no zî çin o.

*Cayêko ke 40 hezar kesan rê awe dîyena de awe zaf tazyîqin a û şertê normalan de karkerêk bikewo mîyan, nêşêno tira sax bivejîyo.

*Reyna cayê ke tede 40 hezar kesî cuyenî de ganî sey barajan qenalê awe bêrî viraştene, labelê VASKî nêyî zî nêkerdo.