Hemsereka KCDyî û parlamentera HDPyî ya Colemêrgî Leyla Guvene  seba wedarnayîşê tecrîdê serê Rayberê Şarê Kurdî Abdullah Ocalanî  27 rojî yo grevê vêşanîye de ya. Sey xeylî cayanê bînan Amed de zî seba paştîdayîşê çalakîya Guvene grêve vêşanîye ame destpêkerdene.

Parlamenterê HDPyî yê Amedî Selçuk Mizrakli, Dersim Dage, Semra Guzele û Musa Farisogullari yê ke grêve vêşanîye de yê derheqê tecrîd, çalakîya Guvene û hêrişê polîsan de ANFyî rê qisey kerd.

HER KES ZANO KE ROLÊ OCALANÎ ZAF MUHÎM O

Selçuk Mizrakliyî bale ante muhîmîya rolê Ocalanî ser û va: ‘‘Seba çareserkerdişê meseleya kurdî û hewlîya Tirkîya tecrîdê serê Birêz Ocalanî ganî ca de bêro wedartene. Wextê dîyayîşênê aşîtî de her kesî eşkera dî ke rolê Ocalanî zaf muhîm o. Coka çalakîya Guvene qîrayîşêk a û ganî hetê her kesî ra bêro eşnawitene.‘‘

BI ZEXT Û HÊRIŞAN NÊEŞKENÎ XOVERDAYÎŞÊ MA BIŞIKNÎ

Semra Guzele zî vist vîrî ke verê weçînayîşanê cayîyan hêrişê serê partîya înan zêdîyayî û va: ‘‘Dewlete bi nê hêrişan hêtek ra zî wazena ke tecrîdî bido vîrakerdene. Bi nê hêrişan wazenê ke şar verê înan de çok bido ro la ma verê zext û hêrişanê înan de milê xo çewt nêkenî. Ê rixmê heme hêrişan nêeşkenî xoverdayîşê ma bişiknî.‘‘

BI USÛLANÊ CÎYAYAN TECRÎDÎ XORÎ KENÎ

Musa Farisogullari zî  waşt ke tecrîdo girankerde ke serê Ocalanî de yeno domnayene ca de bêro wedartene û wina domna: ‘‘Tecrîdo ke 19 serrî yo dewam keno 3 serranê peyênan de bi usûlanê cîya cîyayan yeno xorîkerdene. Çalakîya Guvene heqêko fermî û demokratîk o. Hukmat ganî goş bido nê vengdayîşî û nê waştişanê meşrûyan qebul bikero.‘‘

ÇALAKÎYÊ MA DO BÊRÎ VILAKERDENE

Dersim Dage zî hêrişê polîsan ê serê çalakwanan ê Mersînî vist vîrî û va: ‘‘Ma 5 bajaran de dest bi grevî kerdbi. La hêrişê polîsan ê Mersînî ra dima heme bajaran de vera hêrişê polîsan û paştîdayîşê Guvene qerarê çalakîyan ame girewtene. Çalakîyê ma do bi vilabîyayîşî dewam bikerî. Ma reyna vanî waştişê Guvene waştişê ma pêrunan o.‘‘