Peynîye de şîrketê çekan ê Almanya rê ceza ameye birnayene

Peynîye de mehkemeya Almanî ceza daye şîrketê Heckler&Koch’î yo ke sîlehê G-36’î rotê xeylî dewletan ê kiştoxan ê sey Tirkîya ra bigê heta Nîkaragua.

Îdarekarê şîrketê çêkan ê Heckler& Koch’î mehkemeya Eyaletê Stûttgartî de ameyî mahkemekerdene. Mehkemeye şîrket, pêroyê dinyaye de kiştişê xeylî sivîlan de û naye ra çend serrî aver Meksîka de komkiştişê ke qewimîyayê de mesul dî û ci rê ceza birnaye.

Par bibî eşkera ke şîrketê Heckler&Koch’î teberê Qanûnê Kontrolê Çekan ê Almanya de têgêrayo û qanûn binpay kerdo. Şîrketî çekê bi vaya 4.1 mîlyon dolarî rotê Meksîka ya ke mabênê mafyaya tîryakîrotox û Hêzanê dewlete de şer esto. Dewa Temmuze ra nat dewam kena û mehkemeye şîrketî rê 3.7 mîlyon Euro ceza birnaye.

Mehkemeye qerar da ci ke rotişê çekan ê Meksîka rê teberê qanûnî de yo û 5 xebatkaranê şîrketî rê 17 mengî ceza birnaye û yew xebatkarî rê zî 22 mengî ceza birnaye.

Almanya de bazirganîya çekan zaf nerm a û qerarê cezakerdişê yew şîrketê çekan zaf muhîm o.

SKANDAL BI KIŞTIŞÊ 43 WENDEKARAN VEJÎYABI MEYDAN

26’ê Êlûle 2014 de eyaletê Guerrero yê Meksîka de, yew çalakîye de 43 wendekarî  ameybî tepiştene û nê wendekarî peyê cû teslîmê çeteyê bi nameyê Guerreros Unîdosî ameybî kerdene. Qewimîyayîşî ra dima mezelê komkiştişî ameyî dîyayene. Bi mengan cigêrayîşî ameyî kerdene ke, nê mezelan de cesetê ê wendekaran estê yan çin ê.

Eşkerabîyayîşê mezelanê komkiştişî ra dima 80 endamê çeteyê Guerreros Unîdosî ameyî tepiştene û çekê  destanê înan ra 36’ê  ci G-36’ê şîrketê Almanya vejîyayî. La ganî nê çekî tena tayê eyaletan de bîyameyêne şuxulnayene û eyaletê Guerrero de nêbîyêne.

Nê çekan ra 9 hezar û 500’ê ci serra 2007’î de, hukmatê Almanya rotê Meksîka. Bi cigêrayîşanê aktîvîstanê haştîye vejîya meydan de, şîrketê çekan Heckler&Koch’î bi hezaran çekî, mabênê serranê 2006-2009’î de rotê pêroyê eyaletanê Meksîka.

BI EYNÎ ÇEKAN KURDÎSTAN DE XEYLÎ KOMKIŞTIŞÎ AMEYÎ KERDENE

Çeko G-3 envanterê leşkerîye yê Tirkan de çekêko muhîm o û Kurdîstan de xeylî komkiştişan û cînayetan de ameyo şuxulnayene. Goreyê peymanan, “no çek vera sivîlan û herêmanê şerî de ganî nêro şuxulnayene”. La heta nika Kurdîstan de ameyo şuxulnayene û no derheq de şîrketî rê qet yew ceza nêameya birnayene.