PKKyî bi wesîleya serragêrayîşê 40. eşkerayîyêk daye. Eşkerayîye de vajîya: “Şarê ma yo welatperwer û hêzê şorişgêr-demokratî çar perçeyanê Kurdistanî de û her cayê dinya de serragêrayîşî pîroz kenê. Bi aktîvîte û kombîyayîşan yeno waştene ke PKKyo ke partîya şehîdan û Rayeberîye ya hîna rind bêro famkerdene.”

MA ZERRÎ RA PÎROZ KENÊ

Eşkerayîya PKKyî de nê vajîyayî: “Ma sey îdareyê PKKyî nê atkîvîte û pîrozkerdişanê ke bi kêfweşî yenê viraştene silam kenê. Ma serragêrayîşê partî ro Rayber Abdullah Ocalanî, heme hemrayanê xo yê partîye, şarê ma yê welatperwerî, gerîlayan û dostanê xo yê şorişgêran pîroz kenê. Seke yeno zanayene tarîxê 26-27ê Teşrîna peyêne de dewa Fîsî ya qezaya Licê ya Amedî de kongreya ma virazîyaye û partî amî îlankerdene. Partîya ma 12 Êlule de bi Xoverdayîşê Zîndanî yê Pîlî zorê rejimê faşîst-eskerîyî berde. Bi çalakîyanê 15ê Tebaxe serra 1984 zî xoverdayîşê gerîla yo tarîxî ame destpêkerdene.”

“Partîya ma Newrozê 1985 de ERNK îlan kerd û serranê 1990an de zî bi serewedartişanê şarî Şorişê Ganebîyayîşê Neteweyîyî û Şorişê Azadîya Cinî viraştî. Serranê 1990an de xoverdayîş bi xurtbîyayîş dewam kerd, la partî nêeşka vernîya komploya 15ê Sibate 1999î bigîro. Serra 1998 ya destpêkê bicaardişê komploya mîyanneteweyîye ra heta ewro vîst serrê ke ravêrtî de pîya bi şar û dostanê xo xoverdayîşêkê qehremanîyî ray ra berd. Partîya ma bi hawayêkê raşte raştî averşîyayîşê ke Vakur û Rojawanê Kurdistanî de virazîyayî afernayî û yê ke Başûr de virazîyayî zî bi hawayêkê îndîrektî afernayî.  

PARTÎYA MA SÎSTEMÎ RA VISÎYAYÎŞÎ Û AFERNAYÎŞÊ SÎSTEMÊKÊ ALTERNATÎFÎ XO RÊ ESAS GIREWTÎ

Partîya ma ya ke seba qirkerdişê hemverê şarê kurdî vindarno û azadîya kurdan biaferno vejîya werte, sere ra xo rê afernayîşê sîstemêkê alternatîfî esas girewt. Partîya ma dimayê komploya mîyanneteweyîye paradîgamaya xo vurnaye û xo partîya ke merkezê ci de awankerdişê dewlete esto û îqtîdar wazena ra vet, bîye partîya ke merkezê ci de ekolojîya cimatkîye û azadîya cinîye estê.   

ROJÊ AZADÎYE DINYA ROŞIN KENO

No zihnîyet û xeta teorîke, felsefîke, îdeolojîke û polîtîke ya Rayber Abdullah Ocalanî ke bi Pawitişanê xo de sey Modernîteya Demokratîke pênase kerdibi ewro Kurdistan de bi dereceyanê cîya cîyayan yeno bicaardene û roje bi roje Rojakewtena mîyanêne û dinya rê zî vila beno. Rayberîya Azadîye ewro seba herêma û dinya bîyo Rayberîyêka unîversal e. Rojê Azadîye ke 40 serrî verî roşin dayêne Kurdistanî, ewro roşinê xo dano hemeyê dinya.  

QERARÊ AMERÎKA DEWAMÊ KOMPLOYA MÎYANNETEWEYÎYE YO

Amerîkaya ke komploya 15ê Sibate de rolo sereke kay kerd, komplo plan kerde û ray ra berde nê demê peyênî de zî derheqê hîrê îdarekaranê partîya ma de qerarê tepiştişî da. No bi hawayêkê eşkerayî dewamê komplo yo. Ma sey têgêrayîş xo heme wextan ra hîna bihêz vînenê, la hetêna ra ma nê qerarê Amerîka zî qic nêvînenê, no qerar dewamê komplo yo û ma do hemverê nê de mucadele bikerê.

BÊGUMAN MA DO QEZENC BIKERÊ

Wina aseno ke do sey serranê bînan serra çewres û yewine de zî hemverê hêrişanê faşîstan de bi mucadeleyêkê xurtî yê azadîye bivîyaro. Faşîzmê AKP-MHPyî verê rijîyayîşî de yo. Komplokarî zî goreyê serranê verênan hîna zihîf ê. Ma sey têgêrayîş û şar hadre yê. Ma do serra çewres û yewine de sey têgêrayîş û şar hemeyê hêzê xo seba rijnayîşê faşîzmê AKP-MHPyî bişuxulnê, mîyanê xoverdayîşêkê topyekunî de bibê.

Nê bingeyî de ma sere de serragêrayîşê partî ro Rayber Abdullah Ocalanî, heme hemrayanê xo yê partîye, şarê ma yê welatperwerî, gerîlayan û dostanê xo yê şorişgêran pîroz kenê.''