Komîteya Rayberdişî ya PKKyî derheqê serra 6ine ya qirkerdişê Parîsî de eşkerayîyêka nûştekîye daye û vat: “Parîs de roja 9ê Çile de kişîyayîşê hemrayê ma Sara, Rojbîn û Ronahîyan hetê MÎTo ke binê rayberîya Tayyîp Erdogan û Hakan Fîdanî de bi ame plankerdene û organîzekerdene.”

Eşkerayîya Komîteya Rayberdişî ya PKKyî wina ya:

“Ma bi minet awankerdoxanê partîya ma ra û mîlîtana mucadeleyê azadîye Sakîne Cansize (Sara) û mîlîtananê partîya ma Fîdan Dogane (Rojbîn) û Leyla Şaylemeze (Ronahî) serra 6ine ya kişîyayîşê înan de bi vîr anê.

Mumkun nêbi ke hêrişêko winayên bê paştîdayîşê Fransa û tayê hêzanê Ewropa bêro viraştene. Naye ra Fransa û dewletê Ewropa rasterast qirkerdişî ra berpirsîyar ê. Peynîya tehqîqatê dergî yê çar serran de vejîya werte ke no qirkerdiş bi fermanê hukmatê AKPyî hetê MÎTî ra ameyo kerdene. 

Hewna ke yew menge mendebî ke mehkema dest pê bikero kiştox Omer Guney zîndan de ame kiştene û vernîya muhakemebîyayîşî amî girewtene. Bi nê hawayî sûcdarê esasî yê sey Tayyîp Erdogan, Mehmet Alî Şahîn, Huseyîn Çelîk û Hakan Fîdan ameyî pawitene. Eşkera yo ke Fransa seba menfaatanê qijan vernîya nê meseleyî gêna. Ma wazenê ke no hal hendî bivurîyo; îdareyê Fransa mesuldarîya xo bica bîyaro, sûcdaran eşkera bikero û muhakeme bikero.

No hêriş gama ke Rayberê Şarê Kurdî Abdullah Ocalanî dir pêvînayîşî ameyêne kerdene virazîya. Bi nê hawayî înan waşt ke vernîya halkerdişê problemê Kurdî bigîrê. Yanî no qirkerdiş hetê hêzanê faşîst-qirkerdoxan ê ke estbîyayîşê problemê Kurdî ra weyî bîyêne ame kerdene.

Rayber Apoyî no qirkerdiş sey dewamê komployanê 9ê Teşrîna verêne û 15ê Sibate ercna û îfade kerd ke no hetê hêzano komplokerdoxan ra ameyo organîzekerdene. Eke bi xoverdayîşî vernîya hêrişê komplokerdoxî yo ke bi qirkerdişê Parîsî dest pêkerdibi nêameyêne girewtene û Têgêrayîşê Azadîya Kurdistanî xo aver nêberdêne do vernîya DAÎŞî nêameyêne girewtene û Rojakewtena mîyanêne de çetekarîya faşîste serdest bîyêne.

Eke ma bala xo bidê ci ewro zî hêzanê ke qirkerdişê Parîsî viraştê çar perçeyanê Kurdistanî de û teberê welatî de qirkerdişan ê Kurd û cinîyan domnenê. Înanê ke vizêr Sara, Rojbîn û Ronahîyan qetil kerdî ewro zî Avesta, Delal û Zekîyan qetil kenê.   

La partîya ma û şarê ma yê ke dimayê 6 serran ê qirkerdişê Parîsî bi mucadeleyê xo eşkayî ke heme hêrişanê komplokerdoxan bişiknê û plananê îmha û tasfîyeyan veng vejê. Vakurê Kurdistanî de faşîzmê AKP-MHPyî ameyo verê rijîyayîşî, Rojava de çeteyê DAÎŞî bi temamî ameyî binfînayene û Başur de sîyaseto hemkar bêfonksîyon ame verdayene. Bi nê hawayî qesasê qirkerdişê Parîsî ameyo girewtene.

Nika no mucadeleyê qesasî bi serkêşîya Leyla Guvene sey hemleya serkewtişî ya ‘Ma tecrîdî bişiknê û faşîzmî birijnê’ dewam keno. Na hemleya serkewtişî ke amacê ci weşî û azadîya Rayber Apoyî ya do 2019 de her ca de vila bibo û bibo xeta çalakîye. Serra 2019î di bibo serra serkewtişî ya hemle û do Şehîdê Parîsî nê serkewtişî de biciwîyê!

Nê bingeyî de ma serrgêra 6ine ya şehadetê hemrayanê xo Sara, Rojbîn û Ronahî de înan reyna bi hurmet bi vîr anê, sere de cinî û ciwanî ma veng danê heme şarê xo û dostanê xo ke hemleya serkewtişî ya ‘Ma tecrîdî bişiknê û faşîzmî birijnê’ bi çalakîyanê xurtan aver berê!”