Dimayê kombîyayîşê Komîteya Merkezî ya PKKyî ra eşkerayîyêka nûştekîye amî vilakerdene. Eşkerayîye de babetanê sey hêrişê giranî yê dewleta tirkî, şorişê Rojavayî, îtîfaqê AKP-MHPyî, îşxalê Efrînî ser o ameyî vindertene.

DO ÎMKANANÊ PÎLAN PÊŞKÊŞ BIKERO

Eşkerayîye de ame vatene ke nika şerro ke Rojhelato îyanên û Kurdistan de dîyeno netîceyê xetemnayîşanê Şerrê Dinya yê Dîyinî yê û sey Şerrê Dinya yo Hîrêyin ewro xo ramojneno. No şerrê dinya çende vila beno seva şarê kurdî, şaranê herême û mucadeleyê demokrasî hende îmkan û firsendê pîlî vejênê meydan.

SEVA KE FAŞÎZMÊ AKP-MHPYÎ BÊRO RAŞANAYENE

Dewamê eşkerayîye de ame vatene ke „dewleta tirkî û dewleta Îranî ewro zî bi zihnîyetê wuşkî yê înkarkerdox û îmhakarî wazenê sîyaset bidê dewamkerdene. Hemverê Îranî de hîna bidîqet û bi hemsencî do bêro têgêrayene, la hemverê faşîzmê dewleta tirkî ya kolonyalîst-qirkerdoxî de zî ganî bi xoverdayîşêkê şerrê şarî yê şorişgêrî bi hawayêkê topyekunî faşîzmê AKP-MHPyî bêro raşanayene. Nê bingeyî de îhtîyacî esta ke kurdê ke çar perçeyê Kurdistanî de yê û yê ke teberê welatî de yê, dostê înan û xusûsen zî şarê Tirkîye û heme hêzê şorişgêr û demokratîkî ganî hemverê faşîzmî de bi hemparî mucadele bidê.“  

Kombîyayîşê Komîteya Merkezî de ame vatene ke kombîyayîş de meseleyê tecrîdo girankerde û îşkenceyo ke Îmralî de Ocalanî ser o ameyo zêdekerdene zî ameyo ercnayene, vajîya ke na babete de îdarekarîya Tayîb Erdoganî do reyna bêro îqazkerdene.

HEDEF Û KAMPANYAYA CI AMÎ BEWLÎKERDENE

Komîteya Merkezî ya PKKyî eşkerayîya xo de vat tecrîdê giranî û îşkenceyo ke Îmralî de Ocalanî ser o yeno bicaardene raşte ra wedarîyo, seva ke bireso şertanê azadî, weşî û xebate do mucadele bikerê û Serra 41. yê Mucadeleyê PKKyî de hedefê înan „Şiktişê tecrîdî, raşanayîşê faşîzmî û azadkerdişê Kurdistanî“ yo ke yeno fikirkerdene do bi şeklêkê kampanya bêro rayraberdene.“

Komîte nê bingeyî ser o sere de kadroyanê PKKyî veng da heme hêzanê gerîla, organîzasyonanê cinî û ciwanan, hêz û dostanê sîyasetê demokratîkî û waşt ke wayîr ro na kampanya vejîyê û bi çalakîyanê xo pratîk de bica biyarê. Komîte vengdayîşê xo wina domnayî:

 VAKURÊ KURDISTANÎ Û TIRKÎYE

*Bingeyê nê hedefî ser o ma veng danê heme şarê ma û hezanê demokratîkan ê ke Vakurê Kurdistanî û yê ke metropolanê Tirkîye de ciwîyenê wa heme wareyan de bi hawayêkê aktîfî mucadele bikerê, xoverdayîşê antî-faşîstî yê hemparî virazê, prosesê weçînitişî yo ke qalê ci beno biaçarnê xoverdayîşêkê antî-faşîstî û bi raşanayîşê faşîzmê AKP-MHPyî şaran û merdimatî nê belayê faşîstî ra bifeletnê.

*Ma veng danê şar û hêzanê azadîperweran ê Vakur-Rojhelatê Sûrîye ke Xoverdayîşê Çaxî biresnê serkewtiş, îşxalê faşîstî yê AKP-MHPyî bişiknê Efrînî azad bikerê, sîstemê xo yê demokratîkî awan bikerê û hemverê heme hêrişan de Şorişê Azadîye bipawê û bi hawayêkê aktîfî tewrê kampanya bibê.

*Ma veng danê şar û hêzanê azadîperweran ê Başûrê Kurdistanî ke îxanetê-hemkarîyî hîna zaf teşhîr bikerê û hemverê îşxalê dewleta tirkî ya faşîstî de xoverdayîşê azadîye hîna bikerê xurt, Wareyanê Pawitişî yê Medya hîna xurt bipawê û tewrê kampanyaya ke qalê ci beno bibê. 

ŞARÊ ROJHELATÊ KURDISTANÎ

*Ma veng danê şarê ma yê Rojhelatê Kurdistanî ke bi perwerde û organîzekerdişî faşîzmî raşanê û kampanyaya viraştişê şertanê azadî, weşî û xebata Rayber Abdullah Ocalanî rê paştî bidê.

ŞARO KE TEBERÊ WELATÎ DE YO

*Sere de Ewropa ma veng danê heme şarê ma yê teberê welatî ke wayîr ro mucadeleyê raşanayîşê faşîzmî û kampanyaya viraştişê şertanê azadî, weşî û xebate ya Rayber Ocalanî vejîyê û seva nê çalakîyanê tewir bi tewiran bikerê.

RAYBERÎ DO BÊRO AVERBERDENE Û BIHÊZKERDENE

Eşkerayîye de ame vatene: „Partîya ma seragêrayîşê xo yê 40.î yê awanbîyayîşî de veng dana heme mîlîtananê xo û şarê ma yê welatperwerî ke bi çalakîyanê xo yê tewir-tewiran, bi kêfweşî pîroz bikerê. Mîyanê aşma Teşrîna peyêne de raştîya Rayberî û Şehîdan hîna raşt û xorî ra fam bikerê, seva nê kombîyayîşan virazê.“    

HÎNA AMADE Û BIÎDÎA

Komîteya Merkezî ya PKKyî eşkerayîya xo wina qedênaye: „Têgêrayîşê ma û şarê ma hîna amade û biîdîa dekeweno serra xoverdayîş û serkewtişî ya 41.ine. Do na serre de hîna xurt şerr bikero û hîna pîl qezenc bikero. Nê bingeyî ser o ma serragêrayîşê aye yê 26.inî de şehîda ma ya pîle hemraya xo Berîtane bi vîr anê û şexsê aye de heme şehîdanê ma yê qehremanan bi hurmet û minet bi vîr anê.“