Walîyê bajarî Tuncay Sonelo ke sey qayûm tayînê Şaredarîya Dêrsimî bi, milkanê şaredarîye ra market, otoparke, magaza û buroyî seba ke deynê şaredarîye zaf zêde bîyo, bi îhale roşeno.

Îhaleyo ke 12ê êlule de ameyo viraştene de seba nînan mabênê 54 hezar TL û 456 hezar TL erj ameyo ronayene. Labelê îhale de tena buroyo ke aydê şaredarîye yo, 58 hezar TLyî ra roşîyayo. Çîyê bînî seba vaye ameyî dîyayene, nêroşîyayî.

Seke yeno zanayene qayûmî ewil aşma adare de nê milkanê şaredarîye waştbi biroşo. Dima ra seba ke reaksîyonî zêde bibî, îhale amebî vindarnayene. Labelê 6 aşmî ra dima nê milkê şaredarîye reyna roşîyenî.

Endamanê Meclîsê Şaredarîya Dêrsimî ra keso ke nêwaşt nameyê xo bido, va ‘nê milkî deynan ver roşîyenî’ û wina domna: “Deynî şaredarîye xeylê zaf bîyo. Bi no hawa wazenî deynanê şaredarîye padî. Eke weçînayîşê herêmî bêro viraştene, kamcîn partîye qezenç kena wa bikera, o wext dezgeyo ke qet milkê ci çin o û deynê ci zaf o, bigîra.”