Çeteyanê DAÎŞî 3ê tebaxa 2014î de hêrişê êzidîyan kerdbî. Hêrişan ver bi seyan êzidîyî ameybî qetil kerdene, bi hezaran zî hetê çeteyan ra ameybî remnayene. Qetlîyam ra dima êzidîyî nika seba cuyêka newe, bananê xo newe ra virazenî. Êzidîyî dîyar kenî ke wextê qetlîyamî de Koyê Şengalî înan rê meymandarîye kerdo, cok ra bananê xo qerajê Koyê Şengalî de virazenî.

Nînan ra yew zî hemwelatîyo bi nameyê Semîr Emer o. Emer Gir Ezêr ra yo û o zî banê xo virazeno. Emerî va wextê qetlîyamî de koyê Şengalî înan pawito, cok ra ê nêwazenî ke Şengal ra durî bivinderî.

Goreyê xebera Rojnewsî; Emerî va ‘herkes zano ke 3ê tebaxe êzidîyî çi antî’ û wina dewam kerdo: “Herçiqas ke xeylê zehmetîyî estbî zî, ma newe ra îmkanê cuyayîşî xelq kerd. Verê cû banê ma Gir Ezêr de bi, labelê ma mecbûr mendî ke mal û milkê xo caverdî. Serrêk o ke ma agêrayî erdê pîrozî. Çeteyan mal û milkê ma talan kerdbî. Ma newe ra bananê xo virazenî. Seba ke rayîro ke mabênê ma û Başûrê Kurdîstanî de padaye yo, viraştişê banî zehmet o.”

Emerî peynîya qiseykerdişê xo de wina va: “Herkes zano ke eke ma koyî ra durî bibî, ma do raştê qetlîyaman bêrî. Cok ra ma bananê xo qerajê koyî de virazenî.”