Rojenûşteyanê gerîlayanê şehîdan de 15’ê Sibate

Gerîlayî Jîndar Ezgî Dêrsime, Arjîn Çeme, Zinarîn Întîkame û Hêlîn Mûrat a ke tarîxanê cîyayan de cuya xo vîndî kerda û waştişê înan o hempar o tek vînayîşê Rayberê Şarê Kurdî Abdullah Ocalanî bi, rojenûşteyanê xo de qalê 15’ê Sibate kenê.

Gerîlayê cinîyî yê Kurdî yê ke coxrafyayanê cîyayan ê Kurdistanî ra tewrê sefan bîyê û şehîd kewtê derheqê 15’ê Sibate de hîs û fikirê xo rojenûşteyan de û mektûban de ardê ziwan. Ma rojenûşteyanê fermandaranê YJA Starî Hêlîn Mûrate, Jîndar Ezgî Dêrsime, Zinarîn Întîkame û Arjîn Çeme ra 15’ê Sibate biwanê. 

Gerîlaya YJA Starî û fermandaranê ci ra Jîndar Ezgî Dêrsim a ke serra 2018 de Dêrsim de cuya xo vîndî kerde rojenûşteyanê xo yê kampe de seba Ocalanî nînan vana: “Ez nêzana seba na roje se vajî, ez zehmetîyan ancena… Rayberîye ercan dir hende bîya yew ke ti pêrune têzere de ciwîyenê. Tarîx, serewedartişî, ewro, şehîdî û rastîya ma.

Heta ke ma komploya ke 15’ê Sibate 1925 de amîya destpêkerdene û tarîxê şarê ma yê seserra peyêne sîya kerdibi hîs nêkerdêne, do ewro no çî biameyêne ciwîyayene? Heme qesaso ke ameyêne waştene ke estbîyayîşê Kurdan ra û tarîxê ci ra bêro girewtene, waştêne ke şexsê Rayberîye de bigîrê. Heta ez nê nêvînî ez eşkena manayêka raste bidî na roje?”

MA NA REY DEJANÊ XO NÊ KÊFWEŞÎYA XO PARE KERDÊNE

“Ewro, roja 15’ê Sibat a ke ez Zagrosan de bîya amî mi vîr. A roje fermandarê min o erjaye embaz Reşîd amebi do seba 15’ê Sibate kombîyayîşêk biviraştêne. Ê ma girewtî, teber de vewrî estbî û ma rê cayêk bêvewre dî û ma roniştî. Ti zanê ma rê çi qal kerd, rojenûşte? Ê ma rê qalê hewnê xo yê ke derheqê Rayberîye de dîbî kerdî. Ma ra persa tirêm ma qe Rayberîye hewn de dîyo û eke dîyo ma embazan dir pare bikerê.

Ma na rey dejanê xo yê derheqê Rayberîye de nê, ma sebebanê ke çimeyê ci Rayberîye yo, ê sebeban ra kêfweşîya xo pare kerdêne. Rayberê min o sînaye, her gama ke ti ûca yê, seke xencerêk bigino sîneyê ma ro. Ma eciqîyenê, qehr benê… Heta sozê ke ma dayê to, şarê xo û şehîdanê xo ma bica nêarê, ma do nêeşkê hemverê to, şarê ma, şehîdan û merdimîye de serberz bê. Ma do lazimîyanê sozanê xo heta ma dest ra bêro bica biyarê, no cehd erco tewr berz o û erco tenya yo ke cuya ma keno manîdare.”  

ÇEME: HENDÎ ZERRA MI Û MEZGÊ MI MENDIŞÊ TO YÊ ÛCAYÎ NÊDARENÊ WE

Gerîla û fermandara YJA Starî Arjîn Çeme rojenûşteyanê xo de derheqê komploya 15’ê Sibate de nê nûştê:

“Merdimê biwesfî yo ke mana û hîsî xo de dano ciwînayene rê… Ewro a roj a ke lanetî her ca girewto binê tesîrê xo. Na roje şexsê merdimê berzî de şarî cinîyî, ciwanî û domanî gîrîyayê binê esaretî. Tam bi 8 serrî. Heşt serrî yo ke ti dest nêeşkenê bidê merdiman ra, hucrayêka betonine de mîyanê çar dêsan de yê. Serekê mi ez ewro to dir a, dej û ezabê to rê hempar a. Mi waşt ke ez hemrayîya kemîye xo ser ra bierzî û gureyê ke ti ma ra pawenê biyarî ca.

Ewro Kurdistan de û xeylî cayanê dinya de Kurdî şîn de yê. Meydanan de sozê pêgirewtoxîye danê. Rixmê nê de hêzê serdestî goş nêdanê ma Kurdan. Serekê mi her wexto ke bê to ravêreno îşkence yo. Hendî zerre û mezgê mi mendişê to yê ûcayî nêdarenê we. Vîyane ra dima dejê ma hîna bi pîl. Mi zaf bîrîya to kerda serekê mi. Ez do keda to rê bibî layîqe.”   

MÎLADÊ MERDIMÎYE: 15’Ê SIBATE

Zinarîn Întîkame ya ke fermandaranê YJA Starî ra bîye û serra 2017 de eyaletê Amedî de şehîd kewte, derheqê komploya 15’ê Sibate de hîs û fikirê xo wina ardê ziwan:

“Roja sîyaye; mîlado sîya yê Kurdan û merdimîye: 15’ê Sibate… Ewro ma kewenê serra 15’ine ya komploya 15’ê Sibate. Heme dinya de dewletanê serdestan adeta destê xo da yewbînan û bê ke ercêkê merdimîye nas bikerê şexsê Rayber Apoyî de hemverê Kurdan de û hemverê îradeyê azadîye yê tarîxî de komplo viraşte. Ma ewro zî sey roja ewilêne bidej, hers, kîn û nefretî bi vîr anê. 

Heta ke Rayberîye Îmrali ra nêvejîyo wa çew nêvajo ke ma ciwîyenê, wa çew tu xasekîye ra nêvajo xasekîye. Halê xefletî halê mergî yo. Ganî ma xokrîtîkkerdişêkê rastî bikerê. Xokrîtîkkerdişo tewr rast gama ke rastîya Rayberîye dir bibê yew vejêno meydan. Kesê ke wina yê ancax eşkenê hemverê komploye de bibê wayîrê vindertişêk. Eke ma bizanê rast biciwîyê ma do bieşkê rast şer bikerê û serra 2013’î bikerê serra azadîya fîzîkkîye ya Rayberîye.”

HÊLÎN MÛRATE: MA DO ÇIREY CUYÊKA BÊ RAYBERÎYE QEBÛL NÊKERÊ

Fermandaranê YJA Starî ra Hêlîn Mûrat Cîlo rojenûşteyanê xo ke bi sernameyê ‘çalakîyê 15’ê Sibate’ nûştê de nînan vana: “Çar perçeyanê Kurdistanî de çalakîyê protestokerdişê komploya 15’ê Sibate dest pêkerdî. Dîmenê tewr tesîrdarî mayê ke kîşta doman û ciwanan de destê înan de kemerî eştêne panzêran bî.

Çi heyf ke Rayberîya ma yewna 15’ê Sibate zîndan de ravêrneno. Tarîx do ma nêbeşxno. Qrikerdişê parî mesajêk bî ke hêzanê komplokaran waştêne bidê ma. Bi seyan merdimê ma, xoverdayoxî Cizîre de gane-gane ameyî vêşnayene. Dinya naye temaşe kerde. Çew nêwazeno ke problemê Kurdan bivîno. Ma dewletanê ke wayîrê sîstemê kapîtalîstî yê çi yeno pawitne ke…

Dişmen na menga Sibate xo rê sey firsend vîneno û hêrişanê xo keno vêşî. Xoverdayîşo tewr pîl Îmrali de hetê Rayber Apoyî ra yeno bicaardene. Gama ke roşinê Rayber Apoyî de çimê ma, zerra ma ganê benê û bi roşin benê pir ez hezê pîlî yê cuya azade hîna zaf gêna. Ez hîs kena ke ma kewtê rayîrê eşqê rastekênî. Qezenckerdişê azadîye qetî yo. Rayber Apoyî heme tedbîrê nê girewtê. Çîyo ke keweno ma doşî ganî ma ercê nê bizanê û xebate bikerê, bi terzêkê rastî şexsîyetêkê mucadelekerdoxî biafernê.”