Endamê Komîteya Rayberdişî ya PKKyî Murat Karayilanî bernameyê taybetî yê Stêrk TVyî de persanê Rosîda Mardîne rê cewabî dayî. Karayilanî  babetê sey hêrişê serê Mexmûr û Şengalî, tehdîtê dewleta tirkî yê vera Rojawanî, yewîya neteweyîye, xoverdayîşê şarê Kurdî û grevê vêşanîye ercnayî.

HÊRIŞÎ DO BÊCEVAB MEMANÎ

Karayilanî sere de şehîdê Mexmûr û Şengalî ê ke hêrişê dewleta tirkî de ameyîbî qetilkerdinê sey şehîdanê şorişî name kerdî, serweşîye waşt û va: ‘‘Nê hêrişî do bêcevab memanî, qesas bêro girewtene. Dewleta Tirkî bi 20 teyareyanê şerî hêrişê sivîlan kerd zafê înan cinî 7 tenê bêsucî qetil kerdî û bi naye xo wasifenena. Hêrişo winayên bê paştîdayîşî nêbeno. Tayînan nînan rê berî akerdê û çimî xo qefilnayî.  Ma naye zanê û wazenê ke wa şarê ma zî bizano. Nika rejîmê faşîstî yê Enqera vano ma do PKKyî ro. La Şengal ke înan hêrişê ci kerd uca de HPG çîn o. Kampa Mexmûrî de zî sivîlî estî. Cayê ke DAÎŞî hêrişê înan kerdî ewro Erdogan  zî nê cayan rê hêriş keno. Xerîtaya rayîrî ya Erdogan û DAÎŞî yew a.‘‘

KONSEPTÊ ENQERE  QIRKERDIŞÊ KURDAN O

Karayilanî wina dewam kerd: ‘‘ Dewleta  tirkî resaya konseptêko newe. Goreyê nê konseptî tena zereyê sînoranê Tirkîye de nê teberê ci de zî wazenê hêrişê Kurdan bikerî û erdê înan îşxal bikerî. Amacê nê konseptî Kurdî wayîrê statu mebî. Tersê înan o ke eke Kurdî yew ca bibî wayîr statu ê nêeşkenê Kurdanê Vakurî qir bikerî. Coka vera federasyonê Başûrê Kurdîstanî vejîyayî û ewro zî Rojawan rê hêriş kenî.‘‘

SEMEDÊ YEWÎYA NETEWEYÎYE EREY NÊYO

Karayilanî bale ante muhîmîya yewîya neteweyîye û best pa:‘‘ Dewletê ke Kurdistan îşxal kenî dişmenê yewbînan ê la eke babete bibo Kurd û Kurdistan benî yew û kenî pêsere. La rixmo ke ma Kurdî ke heman keştîye de yê zî platformê hemanî de ma nêeşkenî bêro pêser. No semedê ma  kêmîyeka pîle ya. Seba yewîya neteweyîye hema erey nêyo. Yewîya neteweyîye semedê Kurdan hewceyêko lezabez o. Dewleta tirkî hemverê heme Kurdan şer îlan kerd. Eke ma nê firsatanê tarîxîyan semedê şarê xo meşuxulnê tarîxî do ma ef mekiro.‘‘

TECRÎDÊ SERÊ RAYBER APOYÎ HEME ŞARAN RÊ BENO

Karayilanî tecrîdê Îmrali zî sey  leteyêkê konseptê qirkerdişî hesibna û wina dewam kerd:‘‘Wexto ke qerarê qirkerdişê Kurdan ame girwtene, tecrîdê Îmrali ame destpêkerdene. Qirkerdişê sîyasîyî yê Vakurî, hêrişê vera Rojawan û Başûrî nê heme yewbînan rê pabesteyî. Hemverê tecrîdî de Leyla Guvene rolêko muhîm kay kerde.Reyna Zîndanê Xarpêtî de 6 cinîyan dest bi grevê vêşanîye yê bêdem-bêagêrayîşî kerd la ê hendê rojdem nêbîyî. Grev çend şino vila beno. Xora 30 embazê zîndan û çalakwanê  Strasbourgî zî bi grevê vêşanîye yê bêdem-bêagêrayîşî de yê. Ganî şarê ma çalakwanan rê wayîr bivejo.‘‘

XOVERDAYÎŞÊ ŞARÎ RA TERSENÊ

Karayilanê qiseykerdişê xo wina qedîna: ‘‘Çalakîya grevê vêşanîye ya ke Zîndanê Amedî de ameye destpêkerdene heme perçeyanê Kurdistan û Ewropa ra vila bena. Tehdît û qêrayîşê Erdoganî ra çew nêterseno û peyser game nêezene. Ê do xo vîndî bikerî. Tersê xo ra hêriş kenî.  Zanê ke xoverdayîşê şarî peynîya faşîzmî ano. Nêheq ê, zêîf ê û coka hêrişkar ê. Bêşik o ke vera rejîmê faşîstî yê Enqere do şarê ma ser bikewo.  Ez şexsê Leyla Guvene de heme çalakwanan silam kena û înan rê serkewtiş wazena. Ruhê Zîndanê Amedî do reyna ser bikewo.‘‘