Dewa Buyukçagî ya qezaya Dara Hênî  ya Çewlîgî de vizêr nê pêrey şan qoricîyan wesayîto ke di welatîjî tede bî ser o guleyî varnayî. Hêrişê qoricîyan de hemwelatijan ra Sedat Uzanî dinyaya xo bedilnayebî.

Merdimanê Uzanî cenazeya ey Nêwêşxaneyê Dewlete yê Çewlîgî ra girewt  û goristanê Mardîn Kapi yê qezaya Sûrî ya Amedî de bi merasîmêk defin kerd.

Parlamenterê HDPyî yê Amedî Musa Farisogullari, Dersim Dage, Remzîye Tosune û îdarekarê HDPyî û DBPyî yê bajarî û xeylî kesî tewrê cenaze bîyî.

Dimayo ke wecîbeyê ci yê dînî ameyî bicaardene cenazeya Uzanî ameye definkerdene û rezgirewtiş ra dima Musa Farisogullariyî qisey kerd.

Farisogullariyî merdimanê Uzanî rê serweşîye waşt û va: ‘‘Îqtîdaro faşîst yê AKP-MHPyî kurdan rê dişmenetîye keno. Bi polîtîkaya îmhakerdişî topyekûn hêrişê kurdan keno û qetlîaman virazeno.''

Farisogullari vist vîrî ke Sedat Uzan wexto ke dewa xo de şiyênî cayê birrê pesî hetê qoricîyan ra ameyo qetilkerdene û wina domna: ‘‘Serran ê 90ine de 17 hezar kesî hetê kerdoxî ke vanî nênî zanayene la goreyê ma nê kerdoxî eşkerayî yê, ra ameyî kiştene. La rixmê naye şarê kurdî mucadeleyê xo canêverda û ewro ra tepîya zî do canêverdo. Vera polîtîkaya qetlîamkare vindertişê şarê ma zelal o. gamêk zî ped ser nêameya eştene.‘‘

Keyeyê Uzanî  Şînxaneyê Mîstanî yê Sûrî de tazîye rona.