Karayilanî vat: “Ancax Rayber Apo azad bibo do komploya mîyanneteweyîye bi temamî veng vejîyo.” Karayilan bi meymanê radyoyê DENGÊ WELATÎ û persê Rosîda Mardîne cewab kerdî. Ma qiseykerdişê ê ra çend qisman tîya pare kenê.

PKK PARTÎYÊKA RAYBERÎYE YA

27ê Teşrîna peyêne seba şarê ma û têgêrayîşê ma rojêka tarîxî ya. Roja partîbîyayîşî ya. PKK partîyêka klasîke nêya. Fikirêk, felsefeyêk, ruhêk û terzêkê cuye ya. Verê heme çîyî bawerîyêka xurt a. Xora bawerî çinêbo tu çîyêk nêbeno.

PKKyî de bi terzêkê zerrî ra tewrbîyayîş estbi. Peymeyê tewrbîyayîşê PKKyî bi munaqeşe yan zî qeraran nêbî. Şertê mucadeleyê azadîya Kurdistanî, raştîya komelkîye ya şarê ma û karakterê dişmenî ramot ke ancax bi nê terzî no kar eşkeno bêro kerdene. Eke Kurdistan de ti fedakarî nêkerê, barêk nêdê milê xo ser nêeşkenê serkêşîye bikerê.

KEYEYÊ ÊYÊ KE TEWRÊ PKKYÎ BENÊ HEME KURDISTAN O

Roja ewilêne ra şarê Kurdî vatişanê PKKyîyan ra vêşêr ewnîya senî ê ciwîyenê, bi nê hawayî bawerîya ci pê virazîyaye. Seke Rayber Apo zî vano “PKK romanêk û eşqêk o ke nêqedîyayo.” Eke merdiman dir eşq çinêbo do nêeşko barê giranî yê şorişî wedaro. Gama yew tewrê PKKyî beno keyeyê xo ra, banê xo ra vejêno la dimayo ke tewrê ci beno hemeyê Kurdistanî beno banê ci, hemeyê şarî Kurdî beno keyeyê ci. Eke Rayber Apo û PKK tewr vernî de raye ra nêşîyêne, hemverê her tewir bêîmkanîyan de mucadele nêdayêne merdimê Kurdî de zî nê averşîyayîşî nêvirazîyayêne.   

XOVERDAYÎŞO KE ZÎNDANAN DE YO XEYLÎ MANÎDAR O

Tîmsalê welatperwerîye şehîd Mehmet Tûnç zî kesêko winayên bi. Prosesê xoverdayîşî de vatibi ‘ma serre nênanê ro, wa êyê ke ma ra dima yenê bi ma îftîxar bikerê.’ No ruh ruhê fedaîtîye yo û mekteba PKKyî de yeno qezenckerdene.

Ez heme embazê ma yê ke zîndan de yê înan rê silamanê xo şirawena û roşanê Partî ro înan pîroz kena. Şikitişê tecrîdê Îmralî gureyê ma pêrune yo. Heme zîndananê bînan de zî şidet û zulim bîyo serdest. Ancî sîyasetkara şarê Kurdî ya erjayî Leyla Guvene gamêka berze eşte û xoverdayîş da destpêkerdene. Seba şikitişê tecrîdî şarê ma zî mucadele dano. Bêguman ganî no mucadele hîna bêro xurtkerdene. La baro esas serê milê ma de yo, serê milê kadroyanê na partîye hetta serê milê îdareyê na partîye de yo.     

PROJEYÊ NEWE RA AWANBÎYAYÎŞÎ

Gama Rayber Apo bi azad a game ma do bieşkê vajê ke komploya mîyanneteweyîye bin kewta. Sey şorişgêr û gerîlayê Kurdistanî heta ma Rayber Apoyî nêkerê azad ma nêeşkenê qalê serfirazîye bikerê. Azadîya Rayber Apoyî azadîya Kurdistanî ya.

Seke yeno zanayene mucadele û îdeolojîya azadîya cinîyan a Rayber Apoyî cinîya Kurde hîna kerde bihêz û azade. Rayîrê azadîya komelan azadîya cinîyan ra ravêreno. PKK nê bingeyî ser o ameyo ronayene. PKK heman wextî de partîyêka cinîyan o.

Hemleya 9-10ê Teşrîna peyêne terzêko newe ya û çalakîyê bi nê terzî do dewam bikerê. Ma Projeyê Newe ra Awanbîyayîşî daya vernîya xo. Ma wazenê gerîlayêkê neweyî biafernê. No proje projeyê viraştişê teknîkanê neweyan nêyo, wa no wina nêro famkerdene. Bi nê projeyî ma wazenê terzê têgêrayîşî, barkerdiş û bicabîyayîşî de, terzê cuya gerîlatîye de û terzê şerî de vurayîşan bikerê. Ganî heme embazî naye wina fam bikerê û wina nizd bibê.     

DIŞMEN HEMVERÊ KURDÊ AZADÎ DE YO

Hetê teknîkî ra gerîla do peyê çaxê xo de nêmano. Gerîla nê xusûsî ser o vindeno, ca ca do teknîk bixebetno. La çîyo esasî bicaardişê Projeyê Newe ra Awanbîyayîşî yo. Ganî ma gerîlayêk virazê ke hem bi disîplîn bo, hem lez bo û hem zî îstîxbaratê dişmenî felç bikero. Ganî gerîlayê çaxê ma bizano ke eke îstîxbaratê dişmenî veng vejîyo do netîce bêro girewtene. Mucadeleyê Azadî yê Kurdistanî resayo merheleya xo ya peyêne. Dişmen naye ra xeylî terseno. Vano ‘seba yewî û bekaya xo bipawî ganî mucadeleyê azadî yê Kurdistanî vindarnî.’ Na yewe ra hem Vakur de hem zî Rojava de hêrişê xo kerdê vêşî. Şarê Kurdî hemverê îşxalkarîya tirkî de hîrê perçeyanê Kurdistanî de mucadele dano. Çi destê dewleta faşîste ra ame kerd û hewna zî zextanê xo domnena. Dişmen hemverê Kurdê azadî de yo. Wazeno ke heme Kurdî bibê bende, bibê kole.   

ÇÎYO KE NETÎCE GIREWTO TENYA ÎŞXALÊ EFRÎNÎ YO

Wina aseno çîyo ke dewleta tirkî nê wextanê peyênan de tera netîce girewto tenya îşxalê Efrînî yo. Netîceyê ê zî hewna zelal nêyo. Şarê ma xo ver dano, Efrîn do dewleta tirkî rê nêmano. La nika binê îşxalê Tirkîye de yo. Weçînitişê ke virazîyayî de zî bewlî bi ke şarê ma hemverê zulim û zextan de tayê xo anceno xo zere, la tewirê ci yê hemverê kolonyalîzmî nêvurêno. Tirkîye seba ke şerê hemverê ma de bêçare mende ancî xo bi dayîşê tawîzan resna hêzanê sey Amerîka ke komploya ke nîmecet menda temam bikero.

Ma xo ver da, xo pawit, xeylî şehîdê erjayeyî dayî la hûmara şehîdanê ma goreyê serranê verênan nêbîya vêşî. Labelê goreyê serrewextê verî ma dereceya îdareyî de hîna zaf şehîdî dayî, şarê ma fedakarîyî kerdî. Ma do Projeyê Newe ra Awanbîyayîşî serra 2019î de bikerê dewre. Ma wazenê hemleyanê taktîkan ê neweyan bikerê. La ma zanê ke mesele tenya gerîla nêyo. Hetê organîzbîyayîşê şarî ra zî do xebatî bêrê xurtkerdene.

Mucadeleyê ma serra 41. de reseno tîtikî. Ma nê ra umîdwar ê, tayê hadreyîyê ma estê. Gama ma vanê ma umîdwar ê ma nê sey vatişêkê vengî nêvanê. Xoverdayîşê Rayber Apoyî yo manîdar û nizdbîyayîşê şarê ma yo birûmet seba ma mesajêk o. Na çarçiwaye de sey PKK wazenê ke serra 41. de gamanê neweyan bierzê. Bi nê umîd û bawerîye ma hemeyê şarê xo rê, dostan rê û hemrayan rê rayraşîyayîşê azadîya Rayber Apoyî û Kurdistanî de serfirazî wazenê, reyna roşanê Partî pîroz kenê.