‘Licê de suco gird yeno kerdene la şar îradeyê xo teslîm nêkeno‘

Hemserekê Peroyî yê HDPyî Sezaî Temellî bi heyetêk şi Licê û dîyar kerd ke Licê de sucêko gird yeno kerdene la Licê mûraya mîyanî ya têkoşînî ya û do esla îradeyê xo teslîm nêkero.

Qezaya Licê ya Amedî xeylê waxto ke bi qedexeyê tebervejîyayîşî, operasyonanê eskerî û sîyasî û hêrişanê artêşa tirkî rojdemî de ya. Hemserekê Pêroyî yê HDPyî Sezaî Temellî, Hemserekê KCDyî Berdan Ozturk, Vervatoxa HDKyî Gulîstan Yîgît Koçyîgîte û parlamenteranê HDPyî ra heyetêk qeza zîyaret kerd.

LICÊ DO ÎRADEYÊ XO TESLÎM NÊKERO

Temelî qewimîyayîşê Licê sey sucêko gird hesibna û wina domna:‘‘ No sucê 1925î ra nata yeno kerdene. Licê seserra ke binê ablûqa de ya . Licê yena veşnayene, rijnayene û hûnca wina tabloyêk esta. la Licê mûraya mîyanî ya têkoşînî ya û do esla îradeyê xo teslîm nêkero. Îqtîdar wazeno ke nê îradeyî bişikno la ê do verê îradeyê Licê de vîn bikerî.

OPERASYONÊ SÎYASÎ KAMPANYAYA ERDOGANÎ YA

Temelî dîqet ant operasyonê sîyasîye ser o û va:‘‘ Erdogan bi operasyonan dest kampanyaya weçînayîşî kerd. Bingehê kampanya de dişmenîye kurdan û HDPyî esto. Polîsê ke binê emrê îqtîdarî de yê bi îşkenceyî embazê ma girewtî binêçimî. Ma do hesabê naye û heme sucanê bînan bibersê.