Grevê vêşanîye yê bêdem û bêagêrayîşî yê hemverê tecrîdê serê Rayberê Şarê Kurdî Abdullah Ocalanî ke zîndananê Kurdistan û Tirkîya de yê dewam kenê.

Zîndanê Xarpêtî yo bi hûmara 1 û 2’ine de pêro pîya 12 tepişteyî grevê vêşanîye de yê. Goreyê hayîdarîyanê ke avukatêkê Komeleya Hiqûqnasanê Seba Azadîye ra ameyî girewtene, îdareyê zîndanî tepişteyê ke grevê vêşanîye de yê eştê hucreyanê yew kesî. Îdareyê zîndanî, verî zî wina kerdibi. Bi cehkerdişê avukatan, înan Cengaver Aykulo ke grevê vêşanîye de bi reyna berdibi verê embazanê ci.

Goreyê hayîdarîya peyêne ya avukatan, Zîndanê bi Asayîşê Berzî yê Wanî de tepişteyo bi nameyê Bahtîya Kemal Hasano ke 16’ê Kanûne ra grevê vêşanîye yê bêdem û bêagêrayîşî de yo, îdareyê zîndanî o eşto hucreya yew kesî. Avukatan vat ê tewirê îdareyê zîndanî şopnenê û heme zîndananê bînan ê ke binpaykerdişê winayênî tede qewimîyenê înan muracatê ke lazim ê kerdê.

Xarpêt de nê tepişteyî grev de yê:

Hûmara 1’ine de; Metîn Serhat, Harûn Alkan, Mûsa Candemîr, Îsa Eşsîz, Murat Ergen û Ergûl Tuncay. 

Hûmara 2’ine de; Cengaver Aykul, Serkan Eren, Ahmet Tekîn, Yasîn Gungor, Reşît Teymûr û Mahsûm Ceylan.