Komxebata Weçînitişî yê Cayîyî ya HDPyî Salona Konferansî ya Wedat Aydinî ya banê HDPyî yê Amedî de virazêna.

Ahmet Turko ke komxebate de qisey kerd ard ziwan ke AKP wazeno kurdan bipelexno û vat „Çîyo ke keweno ma milî ser o xurtkerdiş û pîlkerdişê mucadeleyê demokrasî yo.“

'GANÎ MA KÊMÎYANÊ XO RA DERSAN BIGÎRÊ'

Turkî ard ziwan ke ganî kêmîyan ra dersî bêrê girewtene û nê vatî:

„Bedelê giranî dîyayî. Ewro xeylî kadroyê ma yê ke nê karî rayîr ra berê zere de yê. Ganî ma hayî ro mesuldarîyanê xo bibê. Pîya bi xebatkaran û kadroyanê xo ganî ma xo biresnê şarî. Eke ma rixmê waştişanê şarî de tespîtan bikerê do şikîyayîşî virazîyê. Bi nê zanayîşî ganî ma xebatanê xo yê weçînitişê cayîyî rayîr ra berê.“

'ŞARÊ MA PRÎM NÊDANO HÊRIŞAN'

Turkî vat ke „Şarê ma hemverê polîtîkayanê zordaran ê dewlete de tawîz nêdayo û do nêdo. Ge-ge belkî bêveng mendo, la gama ke şîyo sindoqan ser wayîr ro mucadeleyê demokrasî û bedelanê ke dîyayê vejîyayo.“

'MA EŞKENÊ FEHMÊ CEBERRUTÎ RA BIFELETÎYÊ'

Turkî vat „No mucadele mucadeleyêko 40 serre yo, ercê ke hetê HEP, DEP û HADEPî ra ameyê viraştene estê. Xeylî bedel dîya. Wedat Aydinî, Mehmet Sîncarî, Abdulsamet Sakikî estê. Ma bi destpêkerdişê bajaranê girdan eşkenê fehmê ceberrutî ra bifeletîyê.“  

ÎTÎFAQÊ KURDAN

Dewamê qiseykerdişê xo de Turkî ard ziwan ke îtîfaqê kurdan projeyêk o ke derheqê ameyokî de yo û vat: „Helbet heme partîyanê kurdan yê sîyasîyan ê Kurdistanî dir viraştişê yew îtîfaqî projeyêko muhîm yê ameyokî yo.“ 

'ÎNAN SERE DE BAJARÊ GIRDÎ VINÎ KERDÎBÎ'

Sîyasetkaro kurd Ahmet Turkî vat roja ke Suleyman Demîrelî Stenbol, Enqere û Îzmîr kerd vinî îqtîdar zî ê dest ra şi. Peynî de zî wina vat: ''Hêzî ma esto ke ma Mersîn, Edene, Enqere û Stenbol de nê bica biyarê. Seva nê zî ganî ma xebate bikerê.“