28ê Kanûne ya 2011î  de dewa Roboskî ya pabesteya qezaya Qilêbanî ya Şirnexî de bombardûmanê teyareyanê şerî yê dewleta Tirkî de 19ê înan qicî 34 kesî amebî qetilkerdene. Serrgêra 7. ya qirkerdişî de ê ke ameyî qetilkerdene goristan de ameyî vîrardene.

Hemsereka Pêroyî ya HDPyî Pervîn Buldane zî tede xeylî parlementerî û temsîlkarê rêxistinanê sivîlan û avûkatî tewrê merasîmî  bîyî.

VELÎ ENCU

Bi nameyê keyeyan Velî Encu yo ke birayê xo Serhat Encu û xeylî merdimê xo qirkerdiş de vîndî kerdî, qisey kerd.

Encuyî bale ante bêhuqîye ser û va:‘‘Nika ganîkerdişê Dewaya Roboskî sey ganîkerdişê merdeyêkî  zor o.  La ma do mucadeyî ca meverdê, merdeyî ganî  bikerê û edalet bica biyarê.‘‘

Encuyî qerarê Mehkemeya Heqanê Merdiman a Ewropa (MHME)  vist vîrî, kêmîya avûkatan rê hêrsê xo ard ziwan û va: ‘‘Meral Daniş Beştaşe ya ke berbirsîyarîya Dewaya Roboskî girewtebî xo ser û serekê Baroya Şirnexî Nuşîrevan Elçî yo ke evrakêk wextê de nêresna mehkemaye  ganî hesab bidê Roboskîjiyan û heme şarê Kurdî.‘‘

Encuyî seba ke dosya newe ra bêro akerdene waşt ke konferansêk bêro viraştene û wina va: ‘‘Baroyê Kurdistanî, rêxistinê heqanê merdiman, pawitoxê heqê sivîlan wa konferansêk organîze bikerê û heme detayanê Qirkerdişê Roboskî  bêrî qiseykerdene.‘‘

Encuyî veng da hukmatê AKPyî û vat ke 36 birayê ma şima qetil kerdî. Şima çirey nêeşkenî na raştîye ra biremî.

PERVÎN BULDANE

Hemsereka Pêroyî ya HDPyî Pervîn Buldane  zî vat ke no Qirkerdişê Roboskî zî sey qirkedişan bînan bi zanayîş bi destê hukmatê ame viraştene û berpirsîyarê qirkerdişî do hesabê naye bidê.

Buldane vat ke bi nameyê partiya ma eke kêmîya ma esta ez xorexnekerdişê xo dana. La wa keyeyê ma hewle bizanê ke ê çirey tena nêbî ewra ra tepîya zî do tena memanî.