Wan de Şayîya Gencan ya HDPyî yena viraştene
Rêxistina HDPyî ya Wanî şarê Wanî ra waşte ke wa roja yewşeme tewrê şayîya înan ya gencan bibî.
Meclîsê Gencan yê HDPyî yê Wanî roja yewşeme Parka Mûsa Anterî de bi şîarê ‘Sere wedarne azad bike’ şayîya gencan organîze kena.
Derheqê babete de banê HDPyî yê bajarî de kombîyayîşê çapemenîye ame viraştene. Kombîyayîş de Serekê Komîteya Amadekarîye Azîm Yacanî zanayîş da.
Yacanî ard ziwan ke pêroyê muracatê înan yê fermî ameyî qebul kerdene û wina va: “Hunermendan ra Kadîr Çat, Rûken Yilmaze û Fîkret Babat şayî de do konser bidî. Reyna parlameteranê HDPyî ra Dersim Dage û Mûrat Sarisaç zî do tewrê şayîye bibî.”
Yacanî dîyar kerd ke pêroyê xebatê înan yê teknîkî qedîyayî û waşt ke wa roja yewşeme saete 16.00 de sere de gencî û heme şarê Wanî tewrê Şayîya Gencan ke Parka Mûsa Anterî de yena viraştene, bibî.
