Emser seba Wanî ancî serrêka zore bî. Hêzanê JOH û POHan emser Wan de 350 reyî eşt serê keyeyan, 1200 kesî destbend kerdî, înan ra 223 kesî tepiştî û 977 kesî zî bi şertê kontrolê edlîyî ameyî veradayene. Polîso ke hemverê heme fealîyetanê HDPyî de hêrişan keno, Wano ke tede 20 hezarî pabesteyê tîryakî estê hemverê tîryakî de tenya 44 operasyonî viraştî.   

ERTANE: NAMEYÊ SERGIREWTIŞÎ MUCEDELEYÊ HEMVERÊ TERORÎ!

Parlamentera HDPyî ya Wanî û endama Heyetê Îdareyî yê Merkezî Bedîa Ozgokçe Ertane vat fehmo 'asayîşperwer' dimayo ke bi îtîfaqê MHP û AKPyî huqûq û qanûn wedarîya bêvindertiş dewam keno. Ertane wina qisey kerd: “Qelibyayîşê masa ran ata operasyonî nêvindenê. Çunke hemverê nê îqtîdarî tek muxalefet esto o zî HDP yo, Kurd ê û dostê ma yê. Nameyê nimitişê bêkarî, gendelî û dizdî bîyo ‘mucadeleyê hemverê terorî.’ Bi hezaran merdimî yenê ksşkerdene mîyanê tîryak û fuhûşî la bi hawayêkê raştî hemverê nê de mucadele nêno dayene. Heme îdarekar û xebatkarê ma binê kontrolî de yenê girewtene û mecbûr manenê ke hewteyêk ra reyêk şirê asayîş.”   

SARISAÇ: SÛCÊ KE BAJARANÊ KURDAN DE YÊ YENÊ TEŞWÎQKERDENE

Parlamenterê HDPyî yê Wanî Murat Sarisaçî vat ke heqê Kurdan bi hawayêkê bizorî yenê xespkerdene, bajaranê Kurdan de tîryak, fuhûş û qûmarî rê bi zanayîş destûr yeno dayene.

Sarisaçî nê vatî: “Wezîrê Karê zereyî tim vano ke tîryak de nisbetê sûcî kewto. Eksê na îdîaya ê dewlete bajaranê Kurdan de seba ke tîryak, fuhûş û qumar sey sûc nêvînena Soylu wina qisey keno. Wazenê cimatêkê apolîtîkî virazê.

Ma Sakarya de qewimîyayîşêkê dejinî rê bî şahid. Zihnîyetê faşîstî merdimê ke xo ra vatî ma Kurd ê qetil kerdî. Kesê ke polîtîkayanê hukmatî ra cesaret gênê vejîyayê kuçeyan.”