Wan de operasyonê qirkerdişê sîyasîyî bi eşkerayîyêka çapemenîye  ameyî protestokerdene.

Banê HDPyî yê Wanî de  destbendkerdişê hemserekê HDPyî yê bajarî Umît Dede, hemserekê DBPyî yê bajarî Okkeş Kawa, îdarekara HDPyî Handan Karakoyune, hemsereka HDPyî ya qezaya Payîzava Sînem Malale, endamê Melîsê Mayê Aşitîye Xemê Akdogane û Cahîde Olmeze ame protestokerdene. Hemsereka HDPyî ya Wanî Yadîşen Kabulake, Hemsereka DBPyî ya bajarî Aynur Tarhane, temsîlkarê KCDyî, Mayê Aşitîye, Aktîvîstê TJAyî, îdarekarê TUHAY-DER î û xeylî hemwelatijî tewrê eşkerayîye bîyî.

Bi nameyê çalakwanan  Aynur Tarhane qisey kerde. Tarhane bale ante ke îqtîdar terse ra hêriş keno û va: Mayê Aşitîye 70 serre yî bi kelepçeyan destbend kerdî. Mayê ma temînatê aşitîye yê û ganî cade serbest bêrî veradayene. Hukmat wazeno ke bi nê hêrişan vernîya xebatê ma yê weçînitişî bigêro la ê seke wa bikerî ma peyser game nêerzenê û do qezenc bikerê.